حلطمه

كفحله

  
أنا بخير الحمد لله، الحمد لله، الحمد لله بخير، الله يسلمك أنا بخير، بخير الله يسلمك .. *جرعة موية*
 
اهلكتي أمي
tumblr_o3724cvkAr1v9s089o6_r1_500

قبل الـ كفحله، عمركم دققتوا في المجالس والحريم المستقعدات في قمة هالمجالس؟

الحريم الكبار في السن والمتربعات على قمة التسلسل الهرمي بحكم السن أولا ً
ولأنهم غالبا ً هم المتحكمات في كل شؤون الأسره وعلاقاتها الاجتماعيه، من مواجيب وزيارات وزواجات وطلاقات.
كل حرمه من هالحريم الي جالسات في قمة المجلس لها تاريخ طويل ومرعب
وخاضت معركه أو معركتين مع كم حرمه أخرى من نفس المجموعه الي جالسين في قمة المجلس.
وبالتالي أصبح بينهم نوع من الهدنه والمجاملات.
كل حرمه تجبر بناتها وحفيداتها على تملق الحرمه الثانيه لإثبات أمور احنا نجهلها.
في المناسبات الكبيره جدا ً نتوقع أن الفكرة مجرد تجمّع وقهوة وحلى وعشاء كبير وبعدها نروح البيت
وما ننسى طبعا ً عرض الأزياء الي يصير بين بعض البنات الي يهمهم الأمر.
لكن بالنسبة لحريم قمة المجلس فيه منافسه شديده حاصلة احنا مو منتبهين لها
مع أننا نلعب دور هام فيها، كأننا قطع شطرنج عند أهلهم.
.
مثلا ً، واحده من هالحريم حضروا كل بناتها “المتزوجات” وبعضهم عندهم أطفال
وبعضهم أطفالهم في الطريق، نلاقي هالحرمه مشققه من الوناسه والفخر
في الجهه المقابله حرمه ثانيه بناتها متخرجات من تخصصات قويه وموظفات برواتب كالأنهار لكن “غير متزوجات
يعني: ( *هه! In your face !!* بناتك أبو كلب أما بناتي المتزوجات رافعين راسي )
النتيجه 1 – 0 !
 
بعض النقاط تحتسب لصالح الحرمه الي بناتها وحفيداتها يحضرون مناسبات كثير، مختمه المناسبات لهالشهر 
🤣🤣🤣🤣 ثلاث عزايم ورا بعض، يعني ضربة ثلاثية، (تروفي)
  
عموما ً، بعيدا ً عن بطولة “تينكايشي بودوكاي” الي تصير، خلونا في موضوع الـ”كفحله”

الـ كفحله هي الفعل للسؤال عن الحال.

يعني إذا كنت جالس في المجلس وبدأوا الناس يسألونك كيف الحال وش الأخبار إلخ. هذي فقرة الـ “كفحله”.
  
في المجلس أكون ضيفه وصلت من دقيقه وجالسه مكاني
غالبا ً أبدأ أمثل دور الشخص المبسوط لرؤية هذا الحشد من الأحباب.
تسألني واحده من الحريم عن أحوالي، لكن بالسيناريو الطويل التالي:
  
– كيف حالك؟
– الحمد لله
– وش أخبارك؟
– الحمد لله 😐 ( دوبني جاوبت هالسؤال ) 
– عساك طيبه؟
– الحمد لله 
– كيف أهلك؟
– الحمد لله
– عساهم طيبين؟
– ايه طيبين الحمد لله 😤
– كيف أخوانك؟
– الحمد لله ( أخواني هم نفس أهلي، شككتيني في عائلتي ! 😨😨 )
– كيف أبوك؟
– …………….. بخير الحمد لله 
 .
بعد شوي نفس الحرمه تسأل اختي نفس الأسئله !!! يعني بكذب عليك؟ 😧
والمشكله يسـألون أختي كيف حالي أنا ! وأنا جالسه جنبها وقدامهم 🙄
. 

هذا النوع من الأسئله (الـ كفحله) وش جوابه؟

فيزيائيا ً له إجابه واحده، لكن أنت مضطر كشخص عاقل بالغ متملق منافق أنك تغير الاجابات
يكون عندك تشكيله من الاجابات : الحمد للهبخير الله يسلمك طيبين واللهالله يسلمك.
تحتاج برضو مخده صغيره علشان تاخذ غفوه بعد هالأسئلة لأنها مرهقه.
 .
 ملاحظه ، ماعندك صلاحيه ولا حق أنك تقطع الأسئله وتبادر بالسؤال عن حال هذا الشخص علشان تتملص من اسئلته
لو قلت مثلا ً ( الحمد لله بخير، كيف حالك انتي؟ ) راح تطنشك وتكمل نموذج الأسئله الي عندها
. 
في الواقع أن السؤالين ( كيف حالك ) و( وش أخبارك ) لها إجابتين مختلفه إذا كنت مع صديقاتي أو أقارب مقربين جدا ً
.
“كيف حالك” هو سؤال عن حالتك بشكل عام، هل أنت بخير أو لا.
“وش أخبارك” هو سؤال عن جديدك، يكون جوابها مثلا ً
( أبشرك ختمت اللعبه الي ذاك اليوم ) ( شفت الفلم الي أعطيتيني ) وهكذا. أخبار يعني.
.
بس ما أعتقد أن هالحريم يهتمون بأخبارك فعلا ً، They don’t give a shit.
لو قلت لها أبشرك غيرت لون جدران غرفتي أو غيرت أثات الغرفه
بتكون قاطعتني وسألت السؤال الي بعده
لأنها مبرمجه أن مدة الجواب تكفي فقط لجملة ( الحمد لله بخير ) ، هي مب وقحه، لكنها سرحانه 😂😂
.
المجتمع تخطى الهدف الأساسي من الجمعات
علشان كذا صارت ممله ومتكلفه وفيها بروتوكولات كثير.
إن شاء الله الأجيال الجديده يتخلصون من هالهراء، مع أني ما أعتقد ألحق عليهم
لأني من الحين اعتزلت الجمعات إلا الضروري منها.
. 
** الكفحله قد تحمل معاني اخرى في مناطق اخرى، أنا ما أعرف إلا هذا المعنى فلو أحد شطح بتفكيره أنا مالي دخل!
. 
 
 
 
Write a comment