apps and offline apps - تطبيقات الجوال Books - كتب

Audible + Alexa

 

.
قبل شهور كان لي تدوينه عن الكتب المسموعه، ذكرت فيها تطبيقين جوال للكتب المسموعه وهي الي كنت أستخدمها من قبل لأنها مجانيه، بس بعدها غيرت التطبيقين واستبدلتها بتطبيق + جهاز
التطبيق/الموقع الي حولت عليه هو Audible .. وهو تابع لأمازون
Audible1-702x336
الكتب في أمازون أحيانا ً يكون لها صيغ مختلفه من ضمنها 
 Hardcover – Paperpack – Audible وفيه صيغ أخرى زي كندل بس بتكلم عن أهمها
.  
ا Paperpack هي النسخه الورقيه المعتاده في المكتبات عندنا 
.  
 Hardcover موجود عندنا برضو بس مب كل الكتب فيه منها هالصيغه.. يكون ورقي نفس الي فوق لكن 
بغلاف قوي.. وأحيانا ً يكون غلاف جلد ومزخرف ومغطى بغلاف ورقي ينشال لو حابين نشيله بس فايدته أتوقع حمايه
 الهاردكفر شكلها مثل هذا ( Link )
بالنسبه لي أعشق الكتب الهاردكفر، أشكالها دايم تفتح النفس ومغريه
 . 
 Audible هي نسخة مسموعه وتقدر تسمع صوت القارئ قبل لا تشتري علشان لو ما حبيت اسلوبه ما تتوهق
الفكره أنك تشتري الكتاب ويصير موجود في مكتبتك أو حسابك .. تقدر تحمل تطبيق على جوالك وتسمع الكتب الي في مكتبتك عن طريق الجوال
ولو عندك أجهزه مثل آيبود ممكن تعمل اقتران بين حساباتك في آيتيونز و أودبل.. وتنزل كتبك على الجهاز الي تبغاه، وفي ويندوز 10 تطبيق اودبل صار مفيد وتقدر تحمل منه كتبك بسهوله وبدون برامج ثانيه..
 . 
الميزه في Audible، لو اشتركت في عضويتهم المدفوعه يصير عندك كتاب مجاني تحمله كل شهر .. ا
بس لما تسجل في الموقع أول مره لمجرد تسجيل عضويه (تسجيل مجاني) يعطونك كتابين مجانا ً ا
ا( أي كتابين تخطر في بالك حتى لو كانت غاليه ) بس ينتهي العرض خلال شهر ولو ما حملت شيء تروح عليك خلاص
.  
تطبيقهم متوفر على الأبل ستور – الاندرويد – ويندوز 
.
.
.
audible-amazon-alexa
.
هذي Alexa
جهاز صغير ذكي يشتغل بالأوامر الصوتيه، (أليكسا صحيني بكرا الساعه 8) ( كم الساعه ) ا
ا (شوفي الطقس) ( اطلبي لي اوبر ) ( اتصلي لي على أمي ) وهكذا
لكن الأوامر تكون بالانجليزي + لازم تكون متصله بالانترنت طبعا ً، وتحتاج أول ما تشتريها انك تربطها بعضوياتك في أمازون وبعض مواقع الموسيقى والكتب الي تتوافق معها
فيه ناس يستخدمونها يشترون من أمازون، تعطيهم اقتراحات بعد هي وراسها المفلطح..
أليكسا صارت الطريقه الثانيه الي أسمع فيها كتب مسموعه لأن الصوت فيها واضح وأليكسا تحفظ فين وصلت في الكتاب علشان اكمل بعدين.. ا
لها أحجام أخرى، فايدة هالحجم انك ممكن تشتري منه أكثر من وحده وتحطها في باقي الغرف ويصير بيتك كله مشبوك عن طريق أليكسا، يفتح لك اللمبات ويطفيها أو يخفض الاضاءه حسب أمرك، يشغل الأجهزه الي تدعمها سواء الآن أو تضبط لها توقيت متى تشتغل ومتى تطفى، وكمان فيه توصيلات وملحقات تابعه لأليكسا الغرض منها ان العيش يكون أسهل..
أو يمكن ( أكسل ) ما اقتنعت بكل الملحقات، بس تبقى وجهة نظر ..
على فكره أليكسا شخصيتها فله، لو طلبتها تغنى بتغني لك، وتقول لك نكت (سخيفه طبعا ً) ..
مره ولد خالتي سألها “أليكسا، كيف حالك” راحت تقول له سالفه طويله، قال لك تفضفض يا حليلها
الورع ما يعرف انجليزي وما يدري وش تقول بس سألني وش معنى ( كيف حالك ) وقالها لها، وكمل طريقه وهي تتكلم..
فيه برضو (مهارات – Skills ) تحملها على أليكسا من أمازون (مجانيه)، مثلا ً صوت عصافير
هو للاسترخاء بس حطيته علشان أوز عصفوري الفله 
فيه خيارات ومميزات مالها حدود 
لكن طلب البيتزا أو طلب سياره أوبر هذي مب متوفره عندنا لأنها غير مدعومه هنا أصلا ً.. ا
هذي صفحتها على أمازون، بين فتره وفتره يصير عروض مجنونه وينزل سعرها للنصف ( هنا ) ا
كنت ضد هالجهاز وأفكر أننا مب ناقصين أشعه في البيوت ومن هالكلام، بس جاتني هديه من أخوي وانبسطت عليها..
ليش لا؟ جهاز عظيم، طالما أفصلها من الكهرباء وقت النوم أتمنى ما تكون مسببه أضرار كبيره ..
ا 

 

3 thoughts on “Audible + Alexa”

  1. المنزل الذكي “قولز” بكل تأكيد. لا املك جهاز اليكسا لكن امتلك تابلت الفاير، اليكسا ذكيه، لكن لازلت افضل مساعد قوقل الذي استخدمه شبه يوميا في جهازي المحمول.

    شخصيا استخدم اودبل منذ خمس سنوات و لازلت مستمع بها، رغم ان استيعابي و استعادتي للمعلومات ينخفض كثيرا للكتب اللتي تحتاج الى انتباه اكبر، لذلك اقترح على الاخرين استخدامها للروايات.

    تدوينه جميله 🙂

    1. تابلت الفاير من أنواع كندل صح؟ فيه امكانية تحميل تطبيقات ومن هالكلام؟ .. مساعد جوجل للأسف ما جربته، بس أقدر أتخيل أنه افضل من أليكسا بالنسبه لنا كعرب لأنه على الأقل يدعم.. اليكسا ما أقدر اسألها عن الطقس وهالأمور لأن مافيه السعودية من ضمن الدول المحدده لحد الآن.. برضو امكاناتها الفائقه مب مفعله عندنا، زي أوبر وطلبيات المطاعم للناس المدمنه .. بس بما أني ناويه أشتري جهاز أمازون فاير ستك قد يكون لأليكسا فايده اكبر لأنهم متوافقين تماما..

      أتفق معك بخصوص اودبل، أنا اسمع فيه الروايات.. جربت كتاب عن الأساطير اليونانيه، حسيته مب مريح

      شكراً 🌷 قلبت في راسي فكرة مساعد جوجل

Leave a Reply

This site uses Akismet to reduce spam. Learn how your comment data is processed.