Books - كتب

رواية Miss Peregrine’s home for peculiar children

الفتره الماضيه قضيتها بعيد عن النت وقللت التواصل مع الناس. بس كنت اقرأ روايه وهالشيء ما خلاني أحس بالملل تماما ً.
لازلت أحتاج فتره أكون لحالي بدون سوالف ومجاملات.
 .
 .
هذي الروايه (المكونه من 3 كتب) كانت اقتراح من صديقتي يونا الي ما عندها مشكله تقرأ روايات طويله جدا ً جدا ً
**يونا هي رسميا ً المرشد لي في الكتب وألعاب الفيديو لأن ذوقها رهيب وأنا ماعندي سالفه بهالمجالين**
مره اقترحت عليّ أقرأ سلسله من 7 كتب !! 
وكل كتاب أكبر من الثاني، ولازلت أقلب الفكره في راسي لأن هالمجموعه تشهي وأتمنى أقرأها. بس يبقى مشروع مؤجل.
 .
رواية Miss Peregrine's home for peculiar children
الروايه الي قرأتها طوال الفتره الماضيه (Miss Peregrine’s home for peculiar children) للكاتب (Ransom Riggs)
تنتهي في 3 كتب .
بس الكاتب أضاف كتاب آخر فيه قصص خرافيه كانوا أبطال القصه يحبون يقرأونها.
برضو طلعت اصدارات اخرى لكن مب تكمله.. يعني مثلا ً واحد منها كان القصه المصوره.. نفس الأحداث بس كوميكس.
 .
قبل فتره صرّح الكاتب -الي امتلأ جيبه بالفلوس بعد هالسلسله على ما يبدو- أن فيه كتاب رابع تكمله وفيه أسرار وحاجات فخمه.
لسى ما نزل بس راح أشتريه بدون تفكير أول ما ينزل عندنا بإذن الله.. مع العلم أن القصه تعتبر منتهيه لو أحد يبغى يعتبر الثالث هو الأخير.
 .
 .

أجزاء السلسله المتوفره الآن (متوفره في مكتباتنا برضو)

رواية Miss Peregrine's home for peculiar children
Miss Peregrine’s Home for Peculiar Children-
Hollow City-
Library of Souls-
 
والكتاب الاضافي : Tales of the Peculiar
الي شجعني أقرأ الروايه ( بعد توصية يونا طبعا ً ) هو أنها تشبه عرض المسوخ، قصه قديمه وحقيقيه لو أحد سمع فيها من قبل.
عرض المسوخ ( Freak show ) هو سيرك كان فيه ناس “مختلفين” فقط. مثلا ً توأم سيامي، أشخاص ولدوا بعيوب خلقيه
والناس وقتها مو متعودين على هالشيء ويعتبرونه شؤم أو لعنه.
كانوا منبوذين وطريقتهم الوحيده للعيش انهم يشاركون بهالسيرك ويكونون فرجه للناس. ابحثوا في النت وراح تحصلون عنهم معلومات كثير.
عرض المسوخ أصبح قاعده لأفلام ومسلسلات وقصص كثيره.
كتاب Miss Peregrine’s home for peculiar children فيه شخصيات غريبه
سواء في المظهر (زي عرض المسوخ) أو بقدرات غير ظاهره. وكلهم سماهم الكاتب Peculiars ( الكلمه معناها الحرفي غريب أو غير طبيعي ).
 
-في الصوره كتاب ناقص، وحده استعارته مني ولسى ما رجعته-

نبذه للقصه ( ما أنصح بقراءة النبذه للي ما يحب يعرف حاجات عن القصه قبل لا يقرأها )

بداية القصه من يوم كان البطل ( جيكوب ) طفل عادي مثلنا وفي عالمنا ووقتنا هذا
كان متعلق كثير بجدّه، الي يحكي له قصص عن أصدقاء طفولته، وكانت قصصه غريبه
بنت تطير وبنت تطلع من يدها نار ووحده تتحول لطائر وواحد مختفي ما ينشاف منه إلا ملابسه وقبعته.
الغريب أن الجد كان يعرض على جيكوب صور لهالأطفال الي يتكلم عنهم
كان يصدقها لحد ما كبر صار عمره 16 وبدأ يحس أن الجد كان يلعب عليه.
لكن الجد (الي بدأ يكبر في السن كثير وأولاده يعتبرونه مخرف) صار يتكلم عن هالأمور بشكل جاد ويقول لجيكوب حاجات غريبه وأنه في خطر.
جيكوب كان يحس أن جده مخرف فعلا ً، لحد ما حصله يوم من الأيام في الغابات الي ورا بيته 
وهو مصاب ويهمس له انه لازم يرجع للمكان الفلاني والتاريخ الفلاني،
وفي وسط الظلام كان جيكوب يشوف مخلوق مرعب له ألسنه أو مجسات كبيره من فمه، هو الي هاجم الجد، واختفى بعد دقايق.
من بعدها صار جيكوب يعاني من كوابيس عن هالمخلوق ويتذكر كلام الجد، ام وأب جيكوب قرروا يرسلونه لطبيب نفسي.
قرر جيكوب أنه يبحث عن المكان والتاريخ الي قاله الجد.
بعد عناء توصل الى أن مكان هالأطفال في جزيره معينه وقرر يطلب أبوه انهم يسافرون هناك كنوع من الاستجمام
الأب تحمس وفكر فيها كفرصه ان جيكوب يغير جو.
ومن هناك بدأ جيكوب ينبش ويحاول يحصل مكان أصدقاء جده، كيف يكونون موجودين لحد الآن؟ مفروض انهم عجزوا وماتوا بس الرسائل تثبت أنهم موجودين.
d61c7-9

رأيي وتقييمي للكتب الثلاثه

الأول شيق ولطيف جدا ً..
الثاني فيه ثيم خاص وفيه مشاعر قويه تخليك تتعلق بالشخصيات.
الثالث أكشن وأحداث سريعه وتقلبات كثير.
 
الشيء الوحيد الي كان يخليني ما أمسك الكتاب من الصبح إلى الليل هو أن فيه وصف دقيق بزيادة في بعض الأحيان.
بالذات الكتاب الثالث حسيته يحاول يزيد عدد الصفحات وكان فيه وصف دقييييق للأماكن حتى لو ما كانت مهمه.
صح ان الكتاب الأول فيه وصف لكن يحمسك ويهمك لأنك تحتاج تتخيل هالأمور بالتفصيل بما أنها شغلات خياليه جديده علينا.
الكاتب شكله يحب النهايات السعيده وما يحب أنه يموت شخصيات كثير أو يسوي نكد غير ضروري.. يحب يسوي لقطات سعيده كثير.
بس مو معناها مافيه واقعيه أو مافيه نكد. فيه مواقف كانت مؤثره وفيه شخصيات تموت.
بس شخصيا ً تنرفزت من الـ Ymbrynes. معطينهم أكبر من حجمهم وما عندهم سالفه في نظري.
القصه الأصليه للـYmbrynes الي في كتاب Tales of the peculiar حلوه وحسيت دورهم عظيم.. بس في الروايه نفسها ودي أصفقهم، زلايب.
.
فيه برضو شيء لاحظته، الكاتب يعرف يطلع لنفسه مخرج
مرات أحس السالفه تعقدت ومافي أمل يطلعون من المأزق، أتفاجأ أنه يخرجهم من الموقف بطريقه ما تخطر عالبال، تفاجئ وتفرح بنفس الوقت.
** الفيلم المقتبس من الروايه مب مره فخم. مغيرين شوي في الشخصيات، ومختصرينه وطبعا ً النهايه مختلفه.
بس يبقى ممتع.
 
 
الكتاب الجاي الي أنوي أقرأه قصير لأن آخر روايتين قرأتها كانت كلها مكونه من 3 كتب .

Leave a Reply

This site uses Akismet to reduce spam. Learn how your comment data is processed.