Bullet Journal Planning - تخطيط وتنظيم الوقت

فيجن بورد ~Vision Board ~ لوح الرؤية

فيجن بورد vision board
The Lovely photos in this post are taken by Ella Jardim on Unsplash
.
.
بنبدأ سنه جديده خلال أيام، وهذا السبب الي خلاني أنزل موضوع فيجن بورد الحين.
المعنى الحرفي لكلمة “فيجن بورد” في العنوان هو “لوح الرؤية

بس ايش هو الـ “Vision Board

لوحة فيها عبارات وصور تتعلق برؤية تكون أنت خططت تحققها على مدى عدد معين من السنوات أو ممكن يكون سنه.
شفت ناس يسوونه بشكل شهري بس أحس هالشيء يستهلك قيمته ويصير ماله هيبه عندك وتسحب عليه لأنه يتغير بسرعه.
مب شرط تكون حاجات رسميه وكبيره زي زواجات ووظائف وأمور مصيريه
.
بعضهم يحطون من ضمن الرؤيه أنهم بيسافرون بلد معين في خاطرهم من زمان.
فيجن بورد يكون دائما ً موجود عند أي شخص مهتم بتنظيم الوقت والمفكرات وهالشغلات.
.
علشان تسوي لك لوح خاص فيك تحتاج تفهم بعض الأمور عن نفسك وخطتك المستقبليه ووضعك الحالي.
.
.
فيجن بورد

قبل تحديد الخطه

راجع السنه الحاليه (الي بتنتهي) ايش كانت الأشياء الي قدرت تحققها؟ وش الشيء الي بيكون أفضل لو كان تم بشكل مختلف؟ ايش الحاجات الي ماكانت تخدمك ولا تفيدك؟ وحتى من الجانب الشخصي، ايش السلوك أو الطبع الي تتمنى تتخلص منه؟ السلوك الي لاحظته تكرر منك في كم موقف وتبغى تستمر عليه لأنه مب من صفاتك المعتاده.
من هالكلام يعني. علشان يكون اللوح وأهدافك المعلقه فيه جايه من الواقع وبالتالي يسهل عليك تنفذها وتكسبها أسرع.
كل هالكلام تكتبه في ورقه، وتبدأ الحين تفكر في الحاجات الي تبغى تشتغل عليها كأهدافك الجايه.
حاجات ودك تحققها. وش فايدتك بالحياه.. لا أستهبل 😂 بس يعني حدد الأهداف والقيم والأفكار. ارسم خطه واسعه، مب تقيد نفسك بخطوات مرتبطه بوقت وقلق. النتيجه النهائيه فقط، أنا ما اؤمن بالتضييق والتخطيط الدقيق وتصير الحياه بالمسطره، حتى جدولي اليومي ما أكتبه، أكتب مهمات ضروريه وملاحظات ومن هالكلام، بدون تقييد.

بعد تحديد الخطه

الحين الجزء الممتع. اختار لوح أو إطار أو أي شيء يناسبك. اجمع فيه صور وعبارات عن الشيء الي تبغى تحققه.
مثلا ً تكتب عباره في ورقه انك بتتخلص من مشاكل الغضب الي عندك. تحط صور مشابهه للفكره الي في بالك.
شخص وده يسافر للمالديف مثلا ً، يحط صورة من المالديف والمنتجع الي بيسكن فيه لو راح.
صوره لبيت تكون مواصفاته قريبه من البيت الي تتمنى تمتلكه مثلا ً.
حط حتى أدوات، ناس يحطون أدوات ترتبط بفكره في بالهم ويبغون تصير قريبه منهم.
ابدأ نسقها ويستحسن يكون فيه ثيم معين للوح علشان يطلع شكله يفتح النفس.
ممكن تنقسم الأهداف فيه إلى أهداف على المدى القريب وأهداف على المدى البعيد.

وش فايدة الـ”فيجن بورد”؟

الجواب المختصر، أنه يذكرك باستمرار بهدفك علشان تستمر عليه وما تنسى وتنشغل عنه.
الجواب بشكل أشمل: التفكير في الشيء دائما ً وباستمرار يقربك منه، بس ما يكون تفكيرك عنه أنه شيء مستحيل أو أنه أمنيه أو تكون تبغاه بيأس. تفكر فيه على أنك انت في الطريق للحصول عليه، لكن في أعماقك عارف أنه لو ما حصل ترى عادي مب نهاية الدنيا، كذا تكون حذفت مشاعر الرغبه لأنها تخرب عليك كل شيء.

لازم يكون لوح؟

مب شرط أبدا ً. ممكن يكون أي شيء يجمع أفكارك في مكان واحد وبس. ممكن يكون داخل مفكرتك في صفحتين كامله متقابله.

فين المكان المناسب له؟

مكان تشوفه كل يوم وتمر عليه، بس ما يكون قدامك طول الوقت علشان ما تبدأ تتعود عليه وما يصير له قيمه. مثلا ً فوق ماكينة القهوه إذا ما كان مكانها قدامك على طول. مثلا ً داخل دولاب الملابس. أو ورا باب الغرفه بحيث تشوفه إذا جيت تقفل الباب علشان تنام أو أول ما تصحى الصبح تشوفه قبل ما تطلع.

فكرة بديله

الـ فيجن بورد حقي للآن الكتروني، موجود على جهازي. نسقته ورفعته على رابط وحفظته في المفضله، كل ما فتحت المفضله أبحث عن شيء أشوف الرابط وأفتحه. أعترف أنه مب المكان الأنسب لكن لأن السنه ما بدأت وباقي أشوف لو احتجت أضيف تغييرات عليه قبل ما أطبعه وأعلقه.
بس فيه ناس يخلونه الكتروني على طول، يحطونه خلفية سطح المكتب ومن هالكلام. 
ما أحسها مجديه تماما ً لأن الواحد يتأقلم مع خلفية سطح المكتب مع الوقت وماعاد يهتم فيها.
ابدأوا اكتبوا في ورقه كم شيء عن أهدافكم وراجعوا هالسنه، ممكن يطلع الـ فيجن بورد هو الشيء المناسب لك ولطريقة حياتك. ممكن ما تكون البلانرز والمفكرات هي الشيء المناسب لك، لكن اللوح هذا مستحيل ما تحصل حاجات تحطها فيه وتحققها.
شيء أخير. اللوح ماراح يشتغل لحاله زي السحر. لازم انت تشتغل معاه.
.
.
.
بمناسبة انتهاء السنه
.
.
سنة 2018 هي سنه كبرت في داخلي وحبيتها بشكل كبير غير عن أي سنه مرت. صارت فيها أهم الأشياء في حياتي
لو يخيروني يسحبون مني كل الي كسبته وحققته في هالسنه أو أموت ما أدري لحد الآن وش بختار، بس متأكده بأطول وأنا أفكر بحيرة كبيره 
حاسه بغمامه في قلبي علشانها بتنتهي، لكن أعرف نفسي زين، إذا حسيت بهالشعور معناها 2019 بتكون أحسن
بتأكد اني أودعها بشكل جيد وأتأكد أني أشكر ربي بشكل فائض في ليلة اكتمال القمر لأني طالعه بهالبرد أشوف آخر قمر في 2018 وبيكون يوم السبت 22 ديسمبر
.
الي يبغى يجرب شعور التأمل في القمر الكامل لازم يجربها هالشهر ويصير من السنه الجديده يحضر القمر الكامل من بدايته
تقويم القمر الكامل للعام الجديد موجود هنا. فيه غيره أنواع بس اخترت أبو صفحه والمختصر منها علشان الي  يبي يجرب بس وما يبغى يرتبط
Write a comment
Nature

Bad vibes / ترددات مزعجه

ايش يعني Bad Vibes? أو Bad Jojo؟

أولا ً، قارئ ووردبرس يمكن يحوس التنسيق فالأفضل تقرأون على المدونه نفسها!
.
.
هذا الموضوع أستمتع بالتفكير فيه وفي ربط السوالف المتوافقه معه.
قرأت عنه كثير من كم سنه علشان أفهم تفسير منطقي لحاجات حصلت، وما يهم هل أنا اؤمن فيه 100% أو لا.
بس اؤمن أن فيه تفسيرات كثير نجهلها. زمان كان فيه شغلات كثير ما نؤمن فيها ومع الوقت أثبتها العلم وصرنا نؤمن فيها.
علشان كذا ما صرت أحب أستبعد أي شيء بشكل قاطع (كثرة تكسر المعتقدات يهز ثقتك بعقلك فلا تصير عنيد وراسك يابس).
المهم، هنا بعرض لكم تفسيرات وأفكار مثيره للاهتمام من باب الاستمتاع والتفكير فيها.
.
الي ناوي يقرأ وما عنده أي خلفيه عن الذبذبات والترددات الي في هالكون، وكيف ممكن تأثر على أجسامنا وحياتنا 
ممكن ما يفهم السالفه ويعتبرها 100% خرابيط وأوهام. من هنا أقول الي ما يحب الخرابيط بالأساس لا يقرأ ويشغلنا 
.
أنا مب عاد مختمه هالمجال، ولا عندي حتى خبره أو خلفيه كبيره.
بس قرأت عنه من فتره بما يكفي اني أشوفه مب مستبعد تماما ً.
.
.
bad vibes - ترددات المكان
This amazing photo by Joanna Kosinska on Unsplash

قصة العائله الي تحولت حياتها لجحيم وفي الأخير عرفوا السبب وكان من الطبيعة نفسها!

خلال فترة بحثي عن هالمواضيع تذكرت اني قبل أكثر من عشر سنوات شفت برنامج وثائقي مترجم.
البرنامج يتكلم عن الظواهر الخارقه للطبيعه وكيف يمكن تفسيرها علميا ً.
في كل حلقه قصة لعائله ساكنين في بيت جديد. يواجهون مصاعب وأمور غريبه هم ينسبونها للخوارق من أشباح ومن هالكلام. أو زي حالتنا بالبلد ( السحر والعين )
وحده من الحلقات كانت العائله تواجه خلافات عائليه وتغير طباع أفرادها. كان فيه حتى مشاكل صحيه وضعف جسدي والأعصاب تلفانه.
ممكن أي أحد بيقول طبيعي الانتقال لمكان جديد مب سهل على الكل.
بس أنا اتفهم وجود سبب آخر إذا بدأت تحصل حاجات ما يفهمون مبرراتها أفراد العائله أنفسهم، وتوصل الأمور إلى مرحلة اللاعودة في العلاقات.
.
حضروا بعض الأشخاص المختصين علشان يعالجون الأمور في بيت هالعائله.
مثلا ً يعالجون الأنابيب والتسليكات في البيت يتأكدون أن “الأصوات والهالات” الي يسمعونها ويشوفونها أصحاب البيت مب حقيقيه، وانما “قد تكون” بسبب تسرب أدخنه أو غاز ومن هالكلام.
كانت حلقه مليانه تفسيرات واحتمالات. كانوا مركبين كاميرات وأجهزه تقيس الضغط والحراره وكل شيء. ما أبغى أطول السالفه بس المهم في الأخير استنتجوا أن فيه واحده من دورات المياه مرحاضها موجود فوق مكان تختلف طبيعته الجغرافيه.
ما أذكر بس تقريبا ً كان فيه غازات طبيعيه من الأرض تسبب نوع من الضغط والتوتر أو شيء من هالكلام. البرنامج شفته قبل أكثر من 10 سنوات للأسف وما عرفت أبحث عنه بدون الاسم

علاقة القصة بالموضوع؟

علشان تصير مقدمه للي بعده وما تنفجعون.
من ضمن بحثي كنت أبحث عن ترددات الأماكن. هل تختلف كثير وممكن يكون فيه مدينه تردداتها تخنق أو تضايق أصحابها، ومدينه تردداتها تشرح النفس؟ وأنا أبحث كنت أقول لنفسي من جدّك بتحصلين شيء زي كذا؟
بس أكيد مر عليكم هذا الشعور، أماكن أو مدن أو أحياء تسبب لكم ضيقه صدر بدون ما تكونون زرتوها من قبل أو عالأقل ما صار لكم فيها شيء سيء أو موقف يخليكم تحسون بالنفور.
تفاجأت جدا ً لأني حصلت ناس يتكلمون عن هذا الشيء من واقع تجربه!! 
الغريب أن بعضهم اتفقوا على أماكن معينه ان فيها ترددات أو طاقه سلبيه عكس مدن ثانيه.
مرات يكون شارع أو حتى شجره في مكان معين تحسسهم بنفور وخوف ويطلع وراها سالفه. صار برضو أن أشخاص تكلموا عن مكان واحد مثلا ً جانب من حديقه معينه في مكان معين اتفق أكثر من شخص أنه يسبب شعور غير مريح، وطلع أنه صار فيه شيء لا انساني في الماضي.
من ضمن التفسيرات المنطقيه (الي يمكن باقي ما بتفجعكم)
ان الشخص يكون متقرب من روحه ومخلي أحاسيسه بالطبيعه عاليه وهالشيء يخليه حساس تجاه حاجات ممكن ما ينتبه له غيره وممكن تكون مرتبطه بحاجات من الماضي
تقدرون تقرأوون عن هذا الشيء وراح تلاقون له نتائج كثيره علشان تفهمون قصدي

أغرب تفسير قرأته؟

بقول لكم تفسير ممكن 99% منكم ما يصدقونه.
بس قرأته في أماكن كثير وتجارب ناس من حضارت مختلفه يعني مب سالفة شعب معين أو حضاره أو ثقافه وحده.
تخيلوا أجواء الأماكن الي كانت فيها حروب، وكان فيها مستشفى للجنود ينقلون له الجثث والمصابين.
ناس يموتون في هالمستشفى من ألم ومعاناه وهم مقهورين وخايفين ومغمومين. فيه ناس تعوقوا وكانت مشاعرهم ونفسياتهم في الحضيض وناس فقدوا أحبابهم. 
كل هالناس في هالمستشفى خلفوا وراهم كم هائل من النكد والغم والحقد والغضب ومشاعر سلبيه أخرى
والأرض بما أن لها طاقه أصلا ً فهي تتأثر بطاقة الي فيها. وتحتفظ فيها عشرات أو مئات السنين، لأنهم أثروا عليها بشكل جدّي
بعد سنوات أو قرون يصير فيه عمران بهالمكان ويسكنون ناس في بيتهم الجديد فرحانين ومستعدين لحياه جديده
فجأه تشب بينهم مشاكل ونكد وممكن أمراض
.
كنت أقول أن السبب هو تغيير المكان والواحد ما تعود.
بس فيه ناس يكونون أصلا ً متعودين على التنقل وتغيير البيت كل فتره وفتره، بس بيت معين نقلوا له سبب لهم مشاكل.
ما يهم هل أنا اؤمن في التفسيرات الي فوق بذاتها أو لا، بس اؤمن أن فيه أشياء أكثر من مجرد تغيير المكان علينا.
طبعا ً في نظر ناس كثير يشوفون انه هالشيء خزعبلات بس كل ما تقرّب وتواجه أمور من هالنوع تبدأ تتوسع الاحتمالات في ذهنك، لأن التفسيرات المعتاده مو راكبه.
.
ملاحظه مرعبه، فيه حضارات يكون شيء شائع عند العجايز والكبار انهم اذا دخلوا مكان معين وحسوا بنفور يقولون ( المكان هذا ما يرغب فينا ). مخلين أن المكان له إراده مستقله.
لا تستهين أبدا ً بأحاسيس العجايز تجاه الطبيعه!
.
.
.
.
The amazing feature photo in this post’s title is taken by Mr Cup / Fabien Barral on Unsplash
Write a comment