anxiety - القلق Books - كتب DIY Nature

الأصوات المحيطية كبيئة مناسبة للقراءة والاسترخاء

.
 الحاجات الي أبغى أكتب عنها ومقاطع الفيديو الي راح أعرضها ممكن تشوفون في عناوينها يكتبون كلمة ASMR
بس مو هذا الشيء الي أبغى أوصله من تدوينتي أبدا ً!
أنا أتكلم عن نوع آخر من المقاطع لكن بالفتره الأخيره صار هالمصطلح يرتز في أي شيء يكون الغرض منه الاسترخاء، مع العلم أنه غلط وماله علاقه. بكتب السبب باختصار
.
ASMR تطلق على المقاطع الي تعطي المشاهد نوع من الارتياح أو الرضى، مثلا ً بنت تمشط شعر بنت ثانيه، يحطون الأصوات بحيث يسمعها المشاهد كأن الفرشاه تمشط شعره هو.. مثلا ً واحد يعمل مساج لفروة رأس شخص آخر، أو مساج للجسم ومن هالكلام ..
وفيه ناس مدري وش جوهم يحسون بالراحه على مقاطع فيها أصوات أحد يمضغ أكل !! أو يحرك شفايفه ويطلع أصوات ببراطمه
.
بس إجمالا ً فيه انحرافات في هالمصطلح لأنه يرمز أصلا ً لحاجات ممكن تندرج تحت تصنيفات سيئه.
تقدرون تطلعون على معاني وشرح المصطلح بأنفسكم في الانترنت. ما بجيب هالخياس لمدونتي احتراما ً للقراء.
الأصوات المحيطية مو بالضروره تندرج تحت هالمصطلح بس فيه ناس يدمجونها سوا.
.
الأصوات المحيطية Ambience
 
.

أرجع لسالفتي الأساسية الآن بعد ما أبريت ذمتي 😗 

.
وقت القراءة أو الانشغال بشيء في مكان واحد تحتاج تشغل لك شيء تسمعه. بس أحيانا ً تكون محتاج تركيز فما تبغى تسمع شيء فيه كلام أو زحمه.
فيه مصطلح اسمه ( الأصوات المحيطية ) طالعين فيه ناس كثير في قنوات اليوتيوب 😍
يحطون لك فكره معينه يدخلونك جوّها.
.
مثلا ً يحطون لك زاوية تصوير من مقهى ، تشوف الناس ماشيه وتسمع صوت ناس تتكلم بهدوء على شوية أصوات أواني، وأصوات أقدام الناس الرايحه والجايه بعض الأحيان يدخلون موسيقى جاز على خفيف أو بيانو.
بشكل يخليك تحس انك موجود هناك. وما تكون صاخبه ومزعجه.
فيه أفكار وأماكن كثير مصورينها ومسجلينها
.
مره من المرات كنت أبحث وطلعت لي قناه يوتيوب مسوين مقاطع الأصوات المحيطية بثيمات تشبه ألعاب الفيديو والأفلام، مثلا ً هاري بوتر وهوبيت وملك الخواتم وغيرها. يجيب لك صوره مكان من أماكن هالأفلام وأصوات، تدخل جو وتسترخي وانت تشوف البيئه تتغير، مرات يكون فيه مطر وبعد شوي الشمس تشرق. مقاطعهم تكون طويله مثلا ً 3 ساعات، بس الغرض منها مو انك تتابعها طول هالوقت!
بس شغلها واسترخي أو اشتغل أو اقرأ. فيه ناس يستخدمونها يتخلصون من الأرق والقلق والاكتئاب.
.
بحط رابط قناة أعجبتني وصرت أعتمد مقاطعها كثير إذا كنت أبغى أقرأ في جو هادي بدون ما أحس بالنعاس. 
بس قبلها بحط مقطعين أعجبتني من قنوات أخرى 
.
هنا حاطين كوخ من فيلم هاري بوتر. يبدأ المقطع من الفجر بدري على نفس الزاويه في المطبخ.
والشمس تشرق ولو واصلت لآخر المقطع بتلاقي ان الشمس طلعت وصار قبل الظهر تقريبا ً. منظر حلو ومريح 😭❤
.
.
.
المقطع الي بعده من فيلم هاري بوتر برضو <– big fan 😬
لغرفة غريفندور، قدام المدفئة والجو برا ممطر وفترة مساء. صوت المطر معروف انه يهدئ ويساعد الي عندهم أرق بعد.
.
.

الحين جاء وقت القناه العظيمه الي سحرتني بمجال الأصوات المحيطية !

يحطون ثيمات وأجواء غريبه ومميزه، مثلا ً متجر جرعات (potion) زي الي في العصور القديمه.
أو سفينة قراصنه وقت عاصفه ، أو نزل قديم أو مكتبه بطراز قديم وفخم.
.
اسم القناه The Guild of Ambience – ( رابط القناة )
.
.
أقدّر جهودهم كثير، عمل راقي وفكره عبقريه وشغلهم متقن 
شفت قنوات كثير تسوي هالشيء بس هالقناه شغلهم متقن ومزبوط 
جربوا المره الجايه تشغلونها وقت الرسم أو الكتابه أو القراءة أو الأعمال اليدويه
أو حتى لو متبطحين تتفرجون عالسقف وتفكرون في شيء تسوونه.
فيه جزء ثاني لهذا الموضوع من (هنا).
.
.

Write a comment
معنى Hygge
Books - كتب

Hygge معنى

رمضان مبارك، تقبل الله منا ومنكم صالح الأعمال
.

Hygge كلمة دانماركية استخدمت من بدايات عام 1800 لكن أصلها كلمة نرويجية قديمة وهي تشير إلى نمط حياة

مؤخرا ً انتشرت في أمريكا ودول اخرى كثيرة. الكلمة مالها ترجمه حرفية لأنها مشاعر أو توجه ونمط حياة.
حبيت أنقل لكم هالمصطلح بشكل بسيط.
.
تنطق ( هو-جاه ) فيه ياء قبل الواو بالكاد تلاحظها
وحرف G ينطق مثل الي في كلمة Good وليس كما في كلمة Legend.
بعضهم يترجمونها ( العيش بشكل دافئ ومريح ) أو ( العيش بالشكل الذي تحبه مع الأشخاص الذين تحبهم ).
.
اذا اخترت تدخل مود أو نمط حياة Hygge غالبا ً فيه أمور تحتاج تسويها
غير انك تكون مع الأشخاص الي تحبهم وتشارك معهم وقتك ونشاطاتك
فيه كتاب صغير يشرح معنى الكلمه وكيف يقدر الشخص يعيش بهذا النمط
من ضمن الصفحات كان فيه بعض المتطلبات الي تشكل لك نمط حياة متكامل
جمعتها في صوره وحده واختصرت بعض الشرح ..
.
Hygge معنى
.
لفت انتباهي تعريف من تعريفات هالكلمه وهو

( الاستمتاع بكل شيء وكل لحظه، مع الأشخاص الي تحبهم )

هذا التعريف الي أعجبني لأن في السنه الأخيره صرت أحب أستمتع بحاجات بسيطه
نظرا ً لأن المنطقه الي أنا فيها خامله ومافيها أي نوع من أنواع الترفيه الي كنت أحبه
فصرت أستمتع حتى لو خروج للحوش دقيقتين مع أمي توريني شجره أثمرت
أو تقول لي فكره ما عمرنا راح ننفذها بس نستمتع واحنا نناقشها
.
أغلب الي يحبون هالمصطلح يكونون “ديدان كتب” ي
حبون يسوون لهم جو زي كذا لأنهم أغلب وقتهم شبه جاهزين ومستوفين المواصفات المطلوبة لهالنمط.
قراءة الكتب تعتبر من الأمور المناسبه للـHygge.
.
نمط Hygge حلو ومبدأ راقي يمشي عليه الواحد بحياته.
بس ما أعتقد أحد يقدر يخليه نمط حياه مستمر..
عن نفسي شخصيتي متقلبه وديناميكيه ما أحب أتبع نظام هادي ومسالم لفترات طويله
علشان ما أعاني من فرط حركه وأروح أتسلق جبل
بس حلو لما الواحد يكون مكتئب أو طفشان يقدر يخلق لنفسه أجواء ويقدس اللحظه 
من أبسط الأمور المطلوبه والمتبعه: الامتنان الشموع والإضاءاتتناول بعض الأطعمه الخاصه
أعتبره نوع من الحمد ان الشخص يحس بالسعاده والامتنان لمجرد كونه على قيد الحياه بعافيه وكثير من النعم الي ما نقدر نحصيها.
.
.
Write a comment
حديقة الجنيّات
DIY Nature

حديقة الجنيّات ~ Fairy garden

أخيرا ً حديقة الجنيّات!! ❤😭😭😭😭
.
.
من 4 سنوات أو أكثر أبغى أسوي حديقة الجنيّات وأحطها عالشباك
حديقة الجنيّات Fairy Garden شيء يسوونه الناس من الأزل في الحدايق وأحيانا ً يكون داخل البيت 
.
بعض الناس يؤمنون بالجنيات وبعضهم يكتفون بمجرد أنه من اللطيف انهم يصنعون حديقه أو حتى قريه للجنيّات
أغلب المهتمين في هالفكره هم الناس الي أصلا ً يحبون الحاجات الصغيرة ( المصغّراتMiniature
.

أهل الـMiniature هم الناس يصنعون حاجات صغيره

مثلاً بيوت فيها أثاث صغير وبالأدوات الي فيه كامله وحتى المفارش تكون من القماش
الأرضيات تكون خشب واللمبات تشتغل فعلا ً والستاير ممكن في بعض الحالات تنفتح وتتسكر والشبابيك نفس الشيء
.
بالنسبه لي أنا مهتمه بالمصغرات وسبق سويت نماذج صغيره غير ناجحه 
بعضها لحديقه أو حوش أو غرفه داخل علب معدنيه أصغر من راحة اليد
مثل هذا وأصغر منه كمان ( يجيب فرط حركه شنيع علشان كذا وقفته )
.
حديقة الجنيّات
.
حديقة الجنيّات حجمها يعتمد على الحوض أو المساحه الي عندك
أنا أبغى أحطها عالشباك برا غرفتي لأن فيه مساحه كافيه.
حافة الشباك فيها مساحه بارزه مثل الرف
منظر الحديقه هناك بيكون حلو أولا ًَ، وبيعجب العصافيرثانيا ً 😍
.
وبهالمساحه حاطه لهم حوضين مويه برا حديقة الجنيات، واحد لهم وواحد للنحل 
**النحل يجون عند الشباك برضو لأني حطيت ورد ابيض ريحته تشبه العسل
ويحبون يتحممون ويشربون إذا حصلوا حوض صغير ما يغرقون فيه
ينفع تحطون صدفه مقلوبه وفيها مويه بس ارفعوها عن الأرض بسدادة فلين أو شيء يرفعها شوي.
.
بعض الأشخاص يحبون يحطون مجسمات مصغره لكائنات حيه، أرانب ومن هالكلام.
بس أنا أشوف انها تخالف الفكره
الجنيات ما عندهم أصلا ً سناجب وأرانب بحجمهم، فيه فرق بين المصغرات وحديقة الجنيات
.
حديقتي تنقصها جنيّه صغيره تكون جالسه عالحافه
بس للأسف أغلب الي حصلتها في أمازون حجمها كبير بالنسبه للحوض ومقاس البيت والمدخل
لسى أبحث. وبرضو كنت أبغى أثاث خارجي زي كراسي ومظله مصنوعه من اوراق الشجر بس ما توفرت الأغراض عندنا في المكتبات.
.
حديقة الجنيّات
.
.

الي بيقول ( العصافير ما دروا عنك )

أنا أقول انهم دروا عني. يعرفون ان فيه أحد بالغرفه يحط لهم مويه وأكل وألعاب وورد
ومره من المرات لقيت واحد من العصافير يصيح عند الشباك ويخبط علشان ما حطيت مويه
أنا مهتمه بالبيئه الخارجيه لشباك غرفتي، لأني جربت أكسب ثقة العصافير في فتره من الفترات
صاروا فعلا ً يلعبون عند الشباك أغلب الوقت، ويحتمون فيها وقت المطر، ويتسبحون في المويه الي حطيتها لهم
وإذا شغلت أليكسا على اذاعه وبصوت عالي يجون يتلقفون يسمعون ويشوفون وش السالفه
.
أنواع العصافير في المنطقه منوعه وجميله ومن ضمنها الطنّان ( طائر صغيير ومنقاره مثل الابره يحب يشرب من الورد زي النحل ) 
هذا الطائر مبسوط عند الشباك لأني صنعت له مرجيحه صغيره وزينتها بأوراق شجر وورد أحمر لأن الطنان يحب اللون الأحمر
شفته يتمرجح عليها 4 مرات وذاب قلبي 😭😭💔 شيء صغيييير يتمرجح.
.

نجي لصور حديقة الجنيّات الي سويتها وكم ملاحظه عليها 

.
حديقة الجنيّات
حديقة الجنيّات
.
⭐ الكريستالات عالمدخل وعالعمود الي بأقصى اليمين علشان تعكس نور الشمس وينتبهون لها ويجون
وبعد تسوي قوس قزح <-- بذيتينا بقوسك
⭐ قبل فتره كان فيه إطلاق تجريبي لحديقة الجنيات 😂😂😂 سويت واحد مبسط مره وأي كلام
بس علشان أشوف بيعجبهم ولا لا، لأن مافيه شيء يفيدهم أو يقدرون يسوونه فيه.
تفاجأت أن الفضول ذابحهم ، يوقفون عنده ويميلون راسهم ويحاولون يقربون منه بحذر
بعد دقايق صاروا وسطه يستكشفون.
⭐ اللمبات الي حطيتها ماراح يستفيدون منها في النهار وماراح أشغلها في الليل وأبتلش بالحشرات
بس كذا عجبتني قلت أسويها مالي صلاح..
⭐ هذا الشكل لحديقة الجنيات يعتبر بسيط جدا ً، في النت لو تبحثون تشوفون أشكال عظيمه وناس موهوبين فعلا ً.
⭐ المكونات كلها حجر وتراب والباقي لمخيلتك تبدع فيها. أمي ساعدتني كثير وأعطتني أدوات وخامات.
اختي تقول لون المدخل حق البيت مفروض من فوق يكون أحمر وفيه نقشات بيضاء علشان يصير فطر عادي
بس ما أبغى أستخدم ألوان الاكريليك الحين علشان ريحتها قويه وبعد شوي بنام.
.
.
.
Write a comment
الرسم الرقمي
Art - رسم

الرسم الرقمي

 

.
.
خلال الفتره الي راحت حاولت أرجع أرسم الرسم الرقمي وأبحث عن نمط يعجبني علشان أستمر عليه.
جربت أنماط كثير وللأسف أمشي حبتين وأبدأ أطفش وأشوفه مو جوّي.
وطبعا ً مشكلتي اني نادرا ً ما أكمل رسمه للآخر، خاصه اذا كنت أجرب شيء جديد خلاص أوصل للي أبي وأوقف 😗
.
الكلام التالي لحد الرسمه موجه للي مهتمين بالرسم ومستواهم باقي مبتدئ مثلي أو يبحثون عن اسلوب خاص فيهم.
أنواع الرسم الرقمي كثيييير وبعد ما يحصل الواحد نوع مناسب بيبدأ يمشي لحد ما يحصل له بصمه خاصه ومميزه لرسمه
غلط نبدأ نبحث عن نمطنا أو اسلوبنا الخاص من البدايه، فيه ناس ما يحصلونه إلا بعد سنوات.
غلط برضو ان الواحد يستعجل نفسه انه يتطور أو يحصل اسلوبه الخاص ويبدأ يحس أنه ما أنجز شيء !
قبل فتره صار تغيير جذري في رسمي بشكل غريب وبدون سبب، لقيت نفسي أقدر أرسم أجسام ووضعيات ما كنت أعرف حتى أتخيلها.
رحت ضغطت على نفسي وطمعت اني أشوف تطور سريع آخر بنفس سرعة التطور الي قبله.
مع الوقت لقيت نفسي مو متعلقه بالرسم ومالي نفس أرسم وفقدت التطور الي وصلت له!
غلط انك تجمع دروس كثير ودورات أو تتابع قنوات وحسابات كثير وتبدأ تضغط على نفسك وكأن السالفه إجباريه.
.
مافي شيء فعال أكثر من الممارسه سواء الرسم الرقمي أو الورقي
وأنا آخر من يتكلم لأني أستمر وأنقطع، بس حاطه كراسه وقلم قريب من لابتوبي علشان
لو حسيت اني ممكن أنشغل وما أفتح تابلت الرسم أطلع هالكراسه وكل شوي أرسم أي شيء
عين، أنف، شعر أو وضعية جسم معينه وخلاص.
 .
الممارسه سواء في الرسم الرقمي أو غيره مهمه

وطبعا ً مو معناها ما نشوف دروس، بس المهم الواحد ما يضعط على نفسه.

للآن ما حصلت لي ستايل رسم خاص فيني ولا أعتقد اني قربت حتى، بس عادي المهم أرجع أستمتع وآخذ الأمور ببساطه.

ولو ما تطور اسلوبي عادي، قبل سنوات ما كنت أقدر أرسم بنفس مستواي الآن، وهذا بحد ذاته ينحط في الحسبان
من طفولتي كنت أرسم بس يكون قدامي شيء أرسمه أما الآن ممكن أرسم شيء من عقلي.
.
.
الرسم الرقمي
.
هالرسمه كنت راسمتها بعد انقطاع بس خلال الانقطاع كنت أتابع دروس نظري بدون تطبيق.
أسوي هالشيء إرضاء لضميري ،بس في الواقع ماراح يتطور مستوى الشخص وهو متكي 🙄 .
 .
.
الي بعدها كنت أحاول أدمج بين الرسم الواقعي والأنمي، ما أحب الواقعي 100% وما استمتعت برسم ستايل الأنمي 100%
ودايم تجذبني الرسمات الي تكون نص ونص.. ما كملت طبعا ً، كنت أطبق كم شغله تعلمتها وقفلت 😬
 .
الرسم الرقمي
 .
آخر رسمه رسمتها اليوم، أجرب شلون أرسم الأنف، أبغى أوصل لمستوى لا بأس به علشان أنتقل لشيء آخر أتعلمه.
غالبا ً بيكون الشيء الجاي الي أطوره هو الشفايف لأن رسمي لها زي ما هو واضح من جنبها
ما تابعت دروس ولا تدربت عليها كثير بس كان لازم أرسمها علشان أعرف وشلون بتطلع الرسمه.
.
الرسم الرقمي
.

مفروض أضيف تفاصيل لأن الأنف مب مكتمل بهالشكل، بس بالنسبه لي مكفيني هالقدر للآن.

.

قررت ما أرفع رسمات على موقع ديفيانت آرت لأنه أصبح مجتمع مقزز مؤخرا ً

تفكيرهم في انحدار والرسمات الي تميل للاباحيه والتخلف والمرض بدأت تكثر

ومن الأساس ما كنت مهتمه بحسابي ولا أتفاعل مع أحد غير صديقه وحده.

أبحث عن موقع يكون فيه مجتمع كويس ناس يرسمون مب ينزلون بورن وشغلات مقززه.

 .

Write a comment
crystal rainbow
DIY Nature

Fill your room with rainbows

 .
دققتوا من قبل في الشعور الي تحسون فيه إذا شفتوا قوس قزح؟
تحسون أنه شيء من عالم ثاني.. مع أنه شيء ماله فايده ولا أعتقد أنه يساعد في التوازن البيئي ولا يسوي شيء
بس مع ذلك أشوفه نعمه كبيره من ربي.. 
  .
  .
قبل رمضان عام 2017 لقيت كريستالات من ثريّا المدخل كانت مكسوره ومنثوره على الأرض
وأمي تدعي عالعمال الي كانوا يشيلون أثاث وكسروها، تقول (الله يكسر ضلوعهم) <- دعوات مقتبسه من قاموس دعوات جدتي، وهو قاموس لا يمزح بأي شكل من الأشكال *قشعريره* لا تنخدعون بلطف الدعوه السابقه، هذي ولا شيء 
  .
أخذت الكريستالات الي لسى سليمه وعلقتها على شباك غرفتي علشان لما تشرق الشمس من جهة غرفتي أشوف قوس قزح في الغرفه كلها 😎
 .
للأسف كان عباره عن نقط صغيره ومع أنه حلو وعجبني لكن كنت أبغى كريستالات أكبر ..
طلبت أمي أشيل كريستالات كبيره من الثريا المكسوره، أعطتني تحذير ما يمزح، فقررت أبحث بمكان ثاني
 .
في الأخير بعد سنه كامله من البحث حصلت على 4 كريستالات كبيره وعلقتها في سلسله بخرزات وحطيت وحده منها على الشباك علشان أجربها .. هذا شكل الكريستالات:
.
.
rainbow crystal
.
crystal rainbow
,
الصباح التالي كان مبهج بشكل لا يوصف، أعجز عن وصفه، وسعادتي توصل للقمه كل ما أتذكره..
صحيت من النوم لقيت في كل جدران الغرفه وعلى السقف وفي كل مكان ألوان قوس قزح
يا الله كيف شيء بسيييط زي كذا ينعش الروح ويعطي دفى وراحه !!
.
crystal rainbow
.crystal rainbow
.
.
بعدين تذكرت اني مره قرأت أن الكريستالات يستخدمونها الي يؤمنون بمبدأ طاقة المكان
لأنها ترفعها بشكل كبير.
.
قوس القزح من أنقى وأجمل الأمور في الحياه، لاحظوا أنه ظاهره تدخل السعاده في قلب أي شخص.
أكره كيف انه صار شعار للمثليين، وش العلاقه بين المثليين وقوس القزح؟
احتكار شيء من الطبيعه علشان يمثل فئه معينه شيء يدل على تخلف.
 .

 

Write a comment
Books - كتب

رواية Miss Peregrine’s home for peculiar children

الفتره الماضيه قضيتها بعيد عن النت وقللت التواصل مع الناس. بس كنت اقرأ روايه وهالشيء ما خلاني أحس بالملل تماما ً.
لازلت أحتاج فتره أكون لحالي بدون سوالف ومجاملات.
 .
 .
هذي الروايه (المكونه من 3 كتب) كانت اقتراح من صديقتي يونا الي ما عندها مشكله تقرأ روايات طويله جدا ً جدا ً
**يونا هي رسميا ً المرشد لي في الكتب وألعاب الفيديو لأن ذوقها رهيب وأنا ماعندي سالفه بهالمجالين**
مره اقترحت عليّ أقرأ سلسله من 7 كتب !! 
وكل كتاب أكبر من الثاني، ولازلت أقلب الفكره في راسي لأن هالمجموعه تشهي وأتمنى أقرأها. بس يبقى مشروع مؤجل.
 .
رواية Miss Peregrine's home for peculiar children
الروايه الي قرأتها طوال الفتره الماضيه (Miss Peregrine’s home for peculiar children) للكاتب (Ransom Riggs)
تنتهي في 3 كتب .
بس الكاتب أضاف كتاب آخر فيه قصص خرافيه كانوا أبطال القصه يحبون يقرأونها.
برضو طلعت اصدارات اخرى لكن مب تكمله.. يعني مثلا ً واحد منها كان القصه المصوره.. نفس الأحداث بس كوميكس.
 .
قبل فتره صرّح الكاتب -الي امتلأ جيبه بالفلوس بعد هالسلسله على ما يبدو- أن فيه كتاب رابع تكمله وفيه أسرار وحاجات فخمه.
لسى ما نزل بس راح أشتريه بدون تفكير أول ما ينزل عندنا بإذن الله.. مع العلم أن القصه تعتبر منتهيه لو أحد يبغى يعتبر الثالث هو الأخير.
 .
 .

أجزاء السلسله المتوفره الآن (متوفره في مكتباتنا برضو)

رواية Miss Peregrine's home for peculiar children
Miss Peregrine’s Home for Peculiar Children-
Hollow City-
Library of Souls-
 
والكتاب الاضافي : Tales of the Peculiar
الي شجعني أقرأ الروايه ( بعد توصية يونا طبعا ً ) هو أنها تشبه عرض المسوخ، قصه قديمه وحقيقيه لو أحد سمع فيها من قبل.
عرض المسوخ ( Freak show ) هو سيرك كان فيه ناس “مختلفين” فقط. مثلا ً توأم سيامي، أشخاص ولدوا بعيوب خلقيه
والناس وقتها مو متعودين على هالشيء ويعتبرونه شؤم أو لعنه.
كانوا منبوذين وطريقتهم الوحيده للعيش انهم يشاركون بهالسيرك ويكونون فرجه للناس. ابحثوا في النت وراح تحصلون عنهم معلومات كثير.
عرض المسوخ أصبح قاعده لأفلام ومسلسلات وقصص كثيره.
كتاب Miss Peregrine’s home for peculiar children فيه شخصيات غريبه
سواء في المظهر (زي عرض المسوخ) أو بقدرات غير ظاهره. وكلهم سماهم الكاتب Peculiars ( الكلمه معناها الحرفي غريب أو غير طبيعي ).
 
-في الصوره كتاب ناقص، وحده استعارته مني ولسى ما رجعته-

نبذه للقصه ( ما أنصح بقراءة النبذه للي ما يحب يعرف حاجات عن القصه قبل لا يقرأها )

بداية القصه من يوم كان البطل ( جيكوب ) طفل عادي مثلنا وفي عالمنا ووقتنا هذا
كان متعلق كثير بجدّه، الي يحكي له قصص عن أصدقاء طفولته، وكانت قصصه غريبه
بنت تطير وبنت تطلع من يدها نار ووحده تتحول لطائر وواحد مختفي ما ينشاف منه إلا ملابسه وقبعته.
الغريب أن الجد كان يعرض على جيكوب صور لهالأطفال الي يتكلم عنهم
كان يصدقها لحد ما كبر صار عمره 16 وبدأ يحس أن الجد كان يلعب عليه.
لكن الجد (الي بدأ يكبر في السن كثير وأولاده يعتبرونه مخرف) صار يتكلم عن هالأمور بشكل جاد ويقول لجيكوب حاجات غريبه وأنه في خطر.
جيكوب كان يحس أن جده مخرف فعلا ً، لحد ما حصله يوم من الأيام في الغابات الي ورا بيته 
وهو مصاب ويهمس له انه لازم يرجع للمكان الفلاني والتاريخ الفلاني،
وفي وسط الظلام كان جيكوب يشوف مخلوق مرعب له ألسنه أو مجسات كبيره من فمه، هو الي هاجم الجد، واختفى بعد دقايق.
من بعدها صار جيكوب يعاني من كوابيس عن هالمخلوق ويتذكر كلام الجد، ام وأب جيكوب قرروا يرسلونه لطبيب نفسي.
قرر جيكوب أنه يبحث عن المكان والتاريخ الي قاله الجد.
بعد عناء توصل الى أن مكان هالأطفال في جزيره معينه وقرر يطلب أبوه انهم يسافرون هناك كنوع من الاستجمام
الأب تحمس وفكر فيها كفرصه ان جيكوب يغير جو.
ومن هناك بدأ جيكوب ينبش ويحاول يحصل مكان أصدقاء جده، كيف يكونون موجودين لحد الآن؟ مفروض انهم عجزوا وماتوا بس الرسائل تثبت أنهم موجودين.
d61c7-9

رأيي وتقييمي للكتب الثلاثه

الأول شيق ولطيف جدا ً..
الثاني فيه ثيم خاص وفيه مشاعر قويه تخليك تتعلق بالشخصيات.
الثالث أكشن وأحداث سريعه وتقلبات كثير.
 
الشيء الوحيد الي كان يخليني ما أمسك الكتاب من الصبح إلى الليل هو أن فيه وصف دقيق بزيادة في بعض الأحيان.
بالذات الكتاب الثالث حسيته يحاول يزيد عدد الصفحات وكان فيه وصف دقييييق للأماكن حتى لو ما كانت مهمه.
صح ان الكتاب الأول فيه وصف لكن يحمسك ويهمك لأنك تحتاج تتخيل هالأمور بالتفصيل بما أنها شغلات خياليه جديده علينا.
الكاتب شكله يحب النهايات السعيده وما يحب أنه يموت شخصيات كثير أو يسوي نكد غير ضروري.. يحب يسوي لقطات سعيده كثير.
بس مو معناها مافيه واقعيه أو مافيه نكد. فيه مواقف كانت مؤثره وفيه شخصيات تموت.
بس شخصيا ً تنرفزت من الـ Ymbrynes. معطينهم أكبر من حجمهم وما عندهم سالفه في نظري.
القصه الأصليه للـYmbrynes الي في كتاب Tales of the peculiar حلوه وحسيت دورهم عظيم.. بس في الروايه نفسها ودي أصفقهم، زلايب.
.
فيه برضو شيء لاحظته، الكاتب يعرف يطلع لنفسه مخرج
مرات أحس السالفه تعقدت ومافي أمل يطلعون من المأزق، أتفاجأ أنه يخرجهم من الموقف بطريقه ما تخطر عالبال، تفاجئ وتفرح بنفس الوقت.
** الفيلم المقتبس من الروايه مب مره فخم. مغيرين شوي في الشخصيات، ومختصرينه وطبعا ً النهايه مختلفه.
بس يبقى ممتع.
 
 
الكتاب الجاي الي أنوي أقرأه قصير لأن آخر روايتين قرأتها كانت كلها مكونه من 3 كتب .

Write a comment
حلطمه

فين الغيبه؟

Photo By: Oscar

هذي تدوينه من التدوينات الي مصيرها ترجع مسوده بالعاده بعد ما أروق زي تدوينة ( صورة العرض قرد )، بس هالمره بخليها علشان وعدت صديقتي ما أرمي حلطمتي في المسوده
 .
.
( فين الغيبه )
عباره تخليني حرفيا ً أشد شعري لين أسمع صوت شعرات تنقطع
.
لما كنت بالثنوي كان عندي شلتين <<– نفاق
السبب أن صديقة طفولتي/أعز صديقاتي تعرفت على بنت أتوقع أننا في حياه سابقه كنا أعداء وتحاربنا لين قتلنا بعض، سبحان الله ما اتفقنا وكنت أحاول أصير مؤدبه علشان خاطر صديقتي الي تبغى هالبنت في المجموعه، بس هالبنت كل ما تشوفني ساكته ومتحملتها ترمي كلمه تخلينا نتضارب
على فكره هالبنت هي نفسها مارلين مونرو الي في تدوينة ( كوكب زمرده يحترق !!!!!) ا
بالأخير أنا طفشت وصرت أروح مجموعه ثانيه كوميديين
كانوا كويسين وعددهم كبير ويموّتون ضحك وبايعينها دراسيا ًوجالسين ورا
وطبيعي بما أننا طالبات مدرسه وحده وساكنين في منطقه وحده صغيره نوعا ً ما كنا نشوف خلق بعض طول الاسبوع، حتى بالويكند شايفين بعض 
.
كبرنا وتخرجنا من المدرسه وكل وحده انتقلت لمدينه والي تزوجت والي توظفت والي اختفت
في ظروف غامضه
نداء إلى (نهال) الي اختفت من أكثر من 16 سنه في ظروف غامضه، يمديني أكتب نداء في الجرايد؟
صديقاتك الثنتين الي اسماءهم زي بعض يدورون عليك ويسألون عنك في الجامعات وفي أسماء المقبولات في الوظايف وكل مكان هههههههههههههههههه
ما كنتي على ما يرام قبل لا تختفين ! مفروض بلغنا الشرطه بس كنا بزران ما نعرف شيء  
 .
المهم، بعد ما راحت كل وحده من دفعتنا لطريقها، بقينا على تواصل بالجوالات وطبعا ً الزفت حبيب الشعب الواتس ظهر ليفسد حياتي، والشلتين كبروا بدون اهتمامات وحاطين ببالهم أن الواتس ملصق بوجهي
طول اليوم مثلهم، يرسلون لي محادثات من هذا النوع مره كل شهر وما جا ببالهم أن الشغله صارت تجلط
ا( كلام البنت بالبرتقالي ) ا
 .
–  سلااام
– وعليكم السلام
– كيفك
– تمام، كيفك انتي؟
– تمام… ما تزوجتي؟
  لا.. كم مره أقول لك مالي نيّة -_-
– ههههههههه لا إن شاء الله تتزوجين ونرقص في زواجك
– هق هق هق.. المطلوب اتزوج علشان ترقصين يعني؟
 .
 
 .
هالسيناريو ينعاد لحد ما أبدأ أفصل بعد أسابيع من الصبر 😡
 يمين بالله لو قلتي لي اني بتزوج مره ثانيه لا أجيك من أطراف الأرض أجلدك انتي وعيالك وزوجك الي مدري وينه وانتي طول عمرك عالواتس، متأكده أنك تزوجتي؟ وريني أشوف صور عيالك وزوجك وانتي معهم، صوري يدك اذا تستحين، أذكر يدك زين ياما كفختيني فيها يا تبن 

– ههههههههه خلاص أعصابك
 هيا اهجدي
6666 
.
.
.
يبدأ السيناريو يتغير الحين، البنت خايفه على عيالها
– سلام
– أهليين، وعليكم السلام
– كيفك؟
– تمام، انتي كيفك؟
– تمام.. وين الغيبه؟
– أبد، موجوده بس يعني تعرفين كل وحده ساكنه بمدينه ماراح تلقيني بوجهك في كارفور
– خخخخخخخخخخخ
 .
 .
ليييين تطور الوضع من سنتين ونص صار كذا
– فين الغيبه؟
.
كذا بدون سلام ولا كلام ولنا سنتين ونص على هالحال
مع العلم أننا ما نتشارك الاهتمامات الحين وصعب أتكلم معها عن اهتماماتي
وأنا عارفه هالبنت لو قلت لها ( والله شفت مسلسل عجبني رهيييب قصته كذا وكذا تابعيه معي ) بيكون ردها: اها ، وأخبارك؟
مرات أحس الناس يبغون أكشن في الأخبار، شيء زي (أمي وأبوي تطلقوا ، جارتنا دعستها سياره، جاني رعاش، اختي تزوجت، أمس حضرت ملكه وجاني صمم لأن الأغاني صوتها عالي) مع العلم آن آخر خبر راح يقودنا إلى أول محادثه ويخليها تسألني متى تفرح فيني.. ا
 .
كذا يبغون.. وأنا ما عندي هالشيء الي يبحثون عنه ! آسفه لأن ما عندي أكشن يرقى لمستواكم، أنا أعتبر يومي حافل إذا وصلت شحنتي من أمازون لأني أطلب مره في القرن أو إذا أنهيت كتاب بما أني  بطيييئه ما أقرأ دفعه وحده.. الحمد لله يارب، مرتاحه كذا خلاص ليش تبغون فعاليات؟
 .
أحس أن الصداقه مو شيء صعب أو منقرض زي ما نحسب، بس نحتاج نفتح عيوننا كويس على الناس الي نصادفهم في حياتنا، مرات نقابل شخص في مكان عام وما ندري أنه بيكون شخص مهم في حياتنا
ومرات يكون فيه شخص هادي في جماعه وما نتشارك معه أي اهتمام أو نحس أنه مو مهتم فينا، نعرف بعض كعلاقه سطحيه جدا ً لسنواااات، مجرد نشوف بعض بدون ما نتكلم حتى.. وبعد سنوات نجرب نتكلم مع بعض ونتفاجأ فييين كان هذا؟
ا(هذا الآدمي انخلق وانكتب لي أنه يكون من أفضل الأشخاص في حياتي) <– هلو بِنك هودي
.
Write a comment
كتب مسموعة
apps and offline apps - تطبيقات الجوال Books - كتب

الكتب المسموعه || Audible + Alexa

 

.
قبل شهور كان لي تدوينه عن الكتب المسموعه، ذكرت فيها تطبيقين جوال للكتب المسموعه
وهي الي كنت أستخدمها من قبل لأنها مجانيه، بس بعدها غيرت التطبيقين واستبدلتها بتطبيق + جهاز
التطبيق/الموقع الي حولت عليه هو Audible .. وهو تابع لأمازون
Audible1-702x336

الكتب في أمازون أحيانا ً يكون لها صيغ مختلفه من ضمنها 

 Hardcover – Paperpack – Audible وفيه صيغ أخرى زي كندل بس بتكلم عن أهمها
.  
ا Paperpack هي النسخه الورقيه المعتاده في المكتبات عندنا 
.  
 Hardcover موجود عندنا برضو بس مب كل الكتب فيه منها هالصيغه.. يكون ورقي نفس الي فوق لكن 
بغلاف قوي.. وأحيانا ً يكون غلاف جلد ومزخرف ومغطى بغلاف ورقي ينشال لو حابين نشيله بس فايدته أتوقع حمايه
 الهاردكفر شكلها مثل هذا ( Link )
بالنسبه لي أعشق الكتب الهاردكفر، أشكالها دايم تفتح النفس ومغريه
 . 
 Audible هي نسخة مسموعه وتقدر تسمع صوت القارئ قبل لا تشتري علشان لو ما حبيت اسلوبه ما تتوهق
الفكره أنك تشتري الكتاب ويصير موجود في مكتبتك أو حسابك .. تقدر تحمل تطبيق على جوالك وتسمع الكتب الي في مكتبتك عن طريق الجوال
ولو عندك أجهزه مثل آيبود ممكن تعمل اقتران بين حساباتك في آيتيونز و أودبل.. وتنزل كتبك على الجهاز الي تبغاه، وفي ويندوز 10 تطبيق اودبل صار مفيد وتقدر تحمل منه كتبك بسهوله وبدون برامج ثانيه..
 . 
الميزه في Audible، لو اشتركت في عضويتهم المدفوعه يصير عندك كتاب مجاني تحمله كل شهر .. ا
بس لما تسجل في الموقع أول مره لمجرد تسجيل عضويه (تسجيل مجاني) يعطونك كتابين مجانا ً ا
ا( أي كتابين تخطر في بالك حتى لو كانت غاليه ) بس ينتهي العرض خلال شهر ولو ما حملت شيء تروح عليك خلاص
.  

تطبيقهم متوفر على الأبل ستور – الاندرويد – ويندوز 

.
.
.
الكتب المسموعه
.
هذي Alexa
جهاز صغير ذكي يشتغل بالأوامر الصوتيه، (أليكسا صحيني بكرا الساعه 8) ( كم الساعه ) ا
ا (شوفي الطقس) ( اطلبي لي اوبر ) ( اتصلي لي على أمي ) الخ
لكن الأوامر تكون بالانجليزي + لازم تكون متصله بالانترنت طبعا ً
وتحتاج أول ما تشتريها انك تربطها بعضوياتك في أمازون وبعض مواقع الموسيقى والكتب الي تتوافق معها
فيه ناس يستخدمونها يشترون من أمازون، تعطيهم اقتراحات بعد هي وراسها المفلطح 😂😂😂 
أليكسا صارت الطريقه الثانيه الي أسمع فيها كتب مسموعه
لأن الصوت فيها واضح وأليكسا تحفظ فين وصلت في الكتاب علشان اكمل بعدين. ا
لها أحجام أخرى، فايدة هالحجم انك ممكن تشتري منه أكثر من وحده وتحطها في باقي الغرف
ويصير بيتك كله مشبوك عن طريق أليكسا، يفتح لك اللمبات ويطفيها أو يخفض الاضاءه حسب أمرك
يشغل الأجهزه الي تدعمها سواء الآن أو تضبط لها توقيت متى تشتغل ومتى تطفى
وكمان فيه توصيلات وملحقات تابعه لأليكسا الغرض منها ان العيش يكون أسهل.
أو يمكن ( أكسل ) ما اقتنعت بكل الملحقات، بس تبقى وجهة نظر.
على فكره أليكسا شخصيتها فله، لو طلبتها تغنى بتغني لك، وتقول لك نكت (سخيفه طبعا ً).
مره ولد خالتي سألها “أليكسا، كيف حالك” راحت تقول له سالفه طويله، قال لك تفضفض يا حليلها 😂
الورع ما يعرف انجليزي وما يدري وش تقول بس سألني وش معنى ( كيف حالك ) وقالها لها، وكمل طريقه وهي تتكلم.

فيه برضو (مهارات – Skills )

تحملها على أليكسا من أمازون (مجانيه)، مثلا ً صوت عصافير
هو للاسترخاء بس حطيته علشان عصفوري الفله 
فيه خيارات ومميزات مالها حدود 
لكن طلب البيتزا أو طلب سياره أوبر هذي مب متوفره عندنا لأنها غير مدعومه هنا أصلا ً. ا
هذي صفحتها على أمازون، بين فتره وفتره يصير عروض مجنونه وينزل سعرها للنصف ( هنا ) ا
كنت ضد هالجهاز وأفكر أننا مب ناقصين أشعه في البيوت ومن هالكلام، بس جاتني هديه من أخوي وانبسطت عليها.
ليش لا؟ جهاز عظيم، طالما أفصلها من الكهرباء وقت النوم أتمنى ما تكون مسببه أضرار كبيره.
ا 

 

Write a comment
anxiety - القلق Yoga - Mindfulness

يوغا في 30 يوم

قبل فتره لما قررت أترك السهر وأعدل نومي كنت ناويه أبدأ يوغا
وحابه أقول أن اليوغا مب بالضروره ممارسات لها علاقه بعقائد أو مذاهب
يقدر الواحد يمارس يوغا يحرك فيها جسمه أو يصفي ذهنه وانتهينا، اليوغا رياضه بريئه
مالي دخل في الي يجلسون وياخذون نفس عميق ويرددون حاجات غريبه “اوووومممم” ومدري وش
أتكلم عن اليوغا كرياضه تعطي مرونه للجسم لأن هذا الي أبحث عنه 
.
كنت أبغى أوصل لمستوى معين من المرونه واللياقه
فقررت أبدأ بشكل خفيف وحصلت قناه عاليوتيوب لوحده رايقه مسويه من ضمن المقاطع كورس لمدة 30 يوم
يقدر أي أحد يشغل المقطع ويتابع معها
.
قناتها بشكل عام حلوه وفيها قوائم مختلفه، مثلا ً لخسارة الوزن، للتوتر للنوم ومن هالكلام
أنا ما تابعت لها إلا مقاطعها التابعه للـ30 يوم لأني بس كنت أبي البدايه وبعدها أدبر نفسي بمقاطع عندي من أول 
.
..
.
بقول -عن تجربه- أن الوقت المناسب هو الصباح بدري 
لأني جربتها في أوقات ثانيه من اليوم وكانت شيء ممل ويجيب نوم
5647
طيب ليش أشوف أن هالقائمه مناسبه كبدايه للكل؟
لأني جربت أبدأ رياضه عاديه على طول وتعبت وما تأقلمت بسهوله، بينما رياضه زي اليوغا 
تتعود عليها وتصير جزء من يومك وبعدها تقدر تزيد مستوى الجهد أو تحوّل عالرياضه المناسبه لك.
.
بس أنا اؤمن بالبدايات الخفيفه
أول ما بدأت كنت مجربه تطبيق رياضي، وكان فيه من الخيارات مستوى مبتدئ جدا ً جدا
دخلت هالمستوى وتفاجأت أنه بقي شوي وأشيل أثقال، سلمات؟ لو أبدأ بهالمستوى بيصير لي تمزق عضلات
 .
هذا كلام أخوي الي يستخدم هو بعد نفس التطبيق ^ ( الرياضه تسبب إصابات خطيره بمجرد
أنك تنفذ حركه بشكل خاطئ حتى لو ما كانت تعور بس مع التكرار الخاطئ تسبب إصابات )
.
Write a comment
apps and offline apps - تطبيقات الجوال Nature

تطبيقات للعناية بالنباتات

هذي تطبيقات للعناية بالنباتات الداخليه والخارجيه، وهي أفضل تطبيقين بالنسبه لي
لكن ممكن تبحثون عن غيرها لأن فيه تطبيقات للعناية بالنباتات كثير غير هذي
.
.
PictureThis – Plant Identification
PictureThis - Plant Identification
تقدر تصور أي نبته وراح يقول لك اسمها ونوعها وتفاصيل عنها وصور لها علشان تتأكد أنه عرّف لك النتبه الصحيحه
وتقدر تساهم أنك تتعرف على نبتات مو مضافه وتطور البرنامج
برضو تقدر تسأل مختصين لو فيه نبته أنت محتار في نوعها.
فيه ملف شخصي لك تجمع فيه نباتاتك الي صورتها وفيه خصائص أكثر في التطبيق
.
.
.
.
Plantix – grow smart
Plantix - grow smart
ميزة هذا التطبيق عن باقي الـ تطبيقات للعناية بالنباتات أنه يدعم اللغة/الدول العربيه.
تعطي التطبيق صلاحية وصول لموقعك علشان يعطيك مميزات أكثر
مثلا ً بيحدد لك الطقس للأيام الجايه في موقعك، مستوى الرطوبه وسرعة الرياح واتجاهها
غالبا ً الفايده الرئيسيه من هالتطبيق انك تحل مشاكل المحصول أو النباتات الي عندك
لو كان فيه تغيير في لون الأوراق أو بقع أو مشاكل مشابهه ممكن تبحث في مكتبة التطبيق وتعرف المشكله
أو باختصار تصور النبته المصابه وتسأل، راح يعرض مشكلتك على عرب مثلك.
ممكن تختار تعرضها بشكل عالمي وتكتبها بالانجليزي لو حبيت
تقدر تعمل لك ملف شخصي، ومميزات أخرى راح تحصلها لما تثبت البرنامج
عير متوفر على الأبل ستور 

Write a comment