Bullet Journal Planning - تخطيط وتنظيم الوقت

فيجن بورد ~Vision Board ~ لوح الرؤية

فيجن بورد vision board
The Lovely photos in this post are taken by Ella Jardim on Unsplash
.
.
بنبدأ سنه جديده خلال أيام، وهذا السبب الي خلاني أنزل موضوع فيجن بورد الحين.
المعنى الحرفي لكلمة “فيجن بورد” في العنوان هو “لوح الرؤية

بس ايش هو الـ “Vision Board

لوحة فيها عبارات وصور تتعلق برؤية تكون خططت تحققها على مدى عدد معين من السنوات أو ممكن يكون سنه.
شفت ناس يسوونه بشكل شهري بس أحس هالشيء يستهلك قيمته ويصير ماله هيبه عندك وتسحب عليه لأنه يتغير بسرعه.
مب شرط تكون حاجات رسميه وكبيره زي زواجات ووظائف وأمور مصيريه
.
بعضهم يحطون من ضمن الرؤيه أنهم بيسافرون بلد معين في خاطرهم من زمان.
فيجن بورد يكون دائما ً موجود عند أي شخص مهتم بتنظيم الوقت والمفكرات وهالشغلات.
.
علشان تسوي لك لوح خاص فيك تحتاج تفهم بعض الأمور عن نفسك وخطتك المستقبليه ووضعك الحالي.
.
.
فيجن بورد

قبل تحديد الخطه

راجع السنه الحاليه (الي بتنتهي) ايش كانت الأشياء الي قدرت تحققها؟ وش الشيء الي بيكون أفضل لو كان تم بشكل مختلف؟ ايش الحاجات الي ماكانت تخدمك ولا تفيدك؟ وحتى من الجانب الشخصي، ايش السلوك أو الطبع الي تتمنى تتخلص منه؟ السلوك الي لاحظته تكرر منك في كم موقف وكان ايجابي وتبغى تستمر عليه لأنه مب من صفاتك المعتاده.
من هالكلام يعني. علشان يكون اللوح وأهدافك المعلقه فيه جايه من الواقع وبالتالي يسهل عليك تنفذها وتكسبها أسرع.
كل هالكلام تكتبه في ورقه، وتبدأ الحين تفكر في الحاجات الي تبغى تشتغل عليها كأهدافك الجايه.
حاجات ودك تحققها. حدد الأهداف والقيم والأفكار. ارسم خطه واسعه، مب تقيد نفسك بخطوات مرتبطه بوقت وقلق. النتيجه النهائيه فقط، أنا ما اؤمن بالتضييق والتخطيط الدقيق وتصير الحياه بالمسطره، حتى جدولي اليومي ما أكتبه بالساعه والدقيقه، ممكن أكتب لو كانت مهمات ضروريه بس.

بعد تحديد الخطه

الحين الجزء الممتع. اختار لوح أو إطار أو أي شيء يناسبك. اجمع فيه صور وعبارات عن الشيء الي تبغى تحققه.
مثلا ً تكتب عباره في ورقه انك بتتخلص من مشاكل الغضب الي عندك. تحط صور مشابهه للفكره الي في بالك.
شخص وده يسافر للمالديف مثلا ً، يحط صورة من المالديف والمنتجع الي بيسكن فيه لو راح.
صوره لبيت تكون مواصفاته قريبه من البيت الي تتمنى تمتلكه مثلا ً.
حط حتى أدوات، ناس يحطون أدوات ترتبط بفكره في بالهم ويبغون تصير قريبه منهم مثل الأصداف أو تذاكر سفر.
ابدأ نسقها ويستحسن يكون فيه ثيم معين للوح علشان يطلع شكله يفتح النفس.
ممكن تنقسم الأهداف فيه إلى أهداف على المدى القريب وأهداف على المدى البعيد.

وش فايدة الـ”فيجن بورد”؟

الجواب المختصر، أنه يذكرك باستمرار بهدفك علشان تستمر عليه وما تنسى وتنشغل عنه.
الجواب بشكل أشمل: التفكير في الشيء دائما ً وباستمرار يقربك منه، بس ما يكون تفكيرك عنه أنه شيء مستحيل أو أنه أمنيه أو تكون تبغاه بيأس. تفكر فيه على أنك انت في الطريق للحصول عليه، لكن في أعماقك عارف أنه لو ما حصل ترى عادي مب نهاية الدنيا، كذا تكون حذفت مشاعر الرغبه لأنها تخرب عليك كل شيء.

لازم يكون لوح؟

مب شرط أبدا ً. ممكن يكون أي شيء يجمع أفكارك في مكان واحد وبس. ممكن يكون داخل مفكرتك في صفحتين كامله
متقابله. أو الفكره البديله الي في آخر الموضوع تحت.

فين المكان المناسب له؟

مكان تشوفه كل يوم وتمر عليه، بس ما يكون قدامك طول الوقت علشان ما تبدأ تتعود عليه وما يصير له قيمه. مثلا ً فوق ماكينة القهوه إذا ما كان مكانها قدامك على طول. أو مثلا ً داخل دولاب الملابس. أو ورا باب الغرفه بحيث تشوفه كل ما قفلت الباب علشان تنام أو أول ما تصحى الصبح تشوفه قبل ما تطلع.

فكرة بديله

الـ فيجن بورد حقي للآن الكتروني، موجود على جهازي. نسقته ورفعته على رابط وحفظته في المفضله، كل ما فتحت المفضله أبحث عن شيء أشوف الرابط وأفتحه. أعترف أنه مب المكان الأنسب لكن لأن السنه ما بدأت وباقي أشوف لو احتجت أضيف تغييرات عليه قبل ما أطبعه وأعلقه.
بس فيه ناس يخلونه الكتروني على طول، يحطونه خلفية سطح المكتب ومن هالكلام. 
ما أحسها مجديه تماما ً لأن الواحد يتأقلم مع خلفية سطح المكتب مع الوقت وماعاد يهتم فيها.
ابدأوا اكتبوا في ورقه كم شيء عن أهدافكم وراجعوا هالسنه، ممكن يطلع الـ فيجن بورد هو الشيء المناسب لكم ولطريقة حياتكم. ممكن ما تكون البلانرز والمفكرات هي الشيء المناسب لكم لو كنتوا جربتوا وما ارتحتوا عليها، لكن اللوح هذا مستحيل ما تحصلون حاجات تحطونها فيه وتحققونها.
شيء أخير. اللوح ماراح يشتغل لحاله زي السحر. لازم انت تشتغل معاه.
.
.
New Beginning printable planner
.
بالنسبه لمحبين المفكرات والي يحبون يطبعون صفحات اضافيه داخل مفكراتهم
هذي مفكره صممتها للي حابين يبدأون بدايه جديده في حياتهم وينظمون وقتهم.
.
فيجن بورد
.
الأشياء المذكوره والصفحات والطرق المستخدمه فيها كلها مأخوذه من مفكرتي الشخصيه الأولى الي استخدمتها علشان أبدأ أنظم وقتي. الخطوات المكتوبه كلها من راسي بس ناسبتني وساعدتني أني اتحول من شخص عنده مليون شغله وما يسويها بسبب ضيق الوقت إلى شخص يلاقي أوقات فراغ كبيره. مع العلم اني كنت مجربه أبدأ بمفكرات (بلانرز) على طول وما انتظمت لحد ما عدلت بنفسي على المفكرات الي عندي وبدأت بدايه جديده بهالشكل وبهالطرق الي ذكرتها في المفكره.
.
.
سميتها مفكرة البدايات الجديده
كنت محتاجه بداية جديده قبل سنوات والبدايه الي بدأتها فتحت لي فرص كبيره.
.

مكونات المفكرة

– صفحتين ارشادات وأفكار تساعد على البدايه
– تقويم صفحه كامله للسنه: 2019 و2020
– تقويم لبداية كل شهر في صفحه مستقله مع اقتباس
– صفحه تقويم مفرّغ لكل شهر علشان تعبيه بالمواعيد المهمه للشهر
– بداية كل اسبوع صفحه خاصه بالاسبوع فيها أهم المخططات (الأولويات) وملاحظات هامه ومساحه لكل يوم من أيام الاسبوع
– متتبع للعادات خاص بكل شهر ( نوم – رياضه – أكل ومن هالكلام )
– صفحات شهريه للمشتريات والمواعيد المتعلقه بهذا الشهر
– صفحات لكل شهر فيها أكثر الحاجات الي ألهمتك
– اقتراحات وأفكار وصفحات أخرى إضافيه.
.
هذي المفكره جاهزه للطباعه (تطبعها بنفسك) على ورق بحجم: A4 وA5 وLetter واللغه فيها انجليزي. ماعندي أي مشكله أصممها بالعربي لكن لو فيه أحد فعلا ً يبيها. لأن تصميمها باللغتين متعب ومافيه اقبال من العرب أبدا ً لحد الآن على أي تصميم.
.
رابط من موقعي (هنا)
رابط من موقع (Etsy)  
.
Write a Comment