anxiety - القلق Books - كتب DIY Nature

الأصوات المحيطية كبيئة مناسبة للقراءة والاسترخاء

.
 الحاجات الي أبغى أكتب عنها ومقاطع الفيديو الي راح أعرضها ممكن تشوفون في عناوينها يكتبون كلمة ASMR
بس مو هذا الشيء الي أبغى أوصله من تدوينتي أبدا ً!
أنا أتكلم عن نوع آخر من المقاطع لكن بالفتره الأخيره صار هالمصطلح يرتز في أي شيء يكون الغرض منه الاسترخاء، مع العلم أنه غلط وماله علاقه. بكتب السبب باختصار
.
ASMR تطلق على المقاطع الي تعطي المشاهد نوع من الارتياح أو الرضى، مثلا ً بنت تمشط شعر بنت ثانيه، يحطون الأصوات بحيث يسمعها المشاهد كأن الفرشاه تمشط شعره هو.. مثلا ً واحد يعمل مساج لفروة رأس شخص آخر، أو مساج للجسم ومن هالكلام ..
وفيه ناس مدري وش جوهم يحسون بالراحه على مقاطع فيها أصوات أحد يمضغ أكل !! أو يحرك شفايفه ويطلع أصوات ببراطمه
.
بس إجمالا ً فيه انحرافات في هالمصطلح لأنه يرمز أصلا ً لحاجات ممكن تندرج تحت تصنيفات سيئه.
تقدرون تطلعون على معاني وشرح المصطلح بأنفسكم في الانترنت. ما بجيب هالخياس لمدونتي احتراما ً للقراء.
الأصوات المحيطية مو بالضروره تندرج تحت هالمصطلح بس فيه ناس يدمجونها سوا.
.
الأصوات المحيطية Ambience
 
.

أرجع لسالفتي الأساسية الآن بعد ما أبريت ذمتي 😗 

.
وقت القراءة أو الانشغال بشيء في مكان واحد تحتاج تشغل لك شيء تسمعه. بس أحيانا ً تكون محتاج تركيز فما تبغى تسمع شيء فيه كلام أو زحمه.
فيه مصطلح اسمه ( الأصوات المحيطية ) طالعين فيه ناس كثير في قنوات اليوتيوب 😍
يحطون لك فكره معينه يدخلونك جوّها.
.
مثلا ً يحطون لك زاوية تصوير من مقهى ، تشوف الناس ماشيه وتسمع صوت ناس تتكلم بهدوء على شوية أصوات أواني، وأصوات أقدام الناس الرايحه والجايه بعض الأحيان يدخلون موسيقى جاز على خفيف أو بيانو.
بشكل يخليك تحس انك موجود هناك. وما تكون صاخبه ومزعجه.
فيه أفكار وأماكن كثير مصورينها ومسجلينها
.
مره من المرات كنت أبحث وطلعت لي قناه يوتيوب مسوين مقاطع الأصوات المحيطية بثيمات تشبه ألعاب الفيديو والأفلام، مثلا ً هاري بوتر وهوبيت وملك الخواتم وغيرها. يجيب لك صوره مكان من أماكن هالأفلام وأصوات، تدخل جو وتسترخي وانت تشوف البيئه تتغير، مرات يكون فيه مطر وبعد شوي الشمس تشرق. مقاطعهم تكون طويله مثلا ً 3 ساعات، بس الغرض منها مو انك تتابعها طول هالوقت!
بس شغلها واسترخي أو اشتغل أو اقرأ. فيه ناس يستخدمونها يتخلصون من الأرق والقلق والاكتئاب.
.
بحط رابط قناة أعجبتني وصرت أعتمد مقاطعها كثير إذا كنت أبغى أقرأ في جو هادي بدون ما أحس بالنعاس. 
بس قبلها بحط مقطعين أعجبتني من قنوات أخرى 
.
هنا حاطين كوخ من فيلم هاري بوتر. يبدأ المقطع من الفجر بدري على نفس الزاويه في المطبخ.
والشمس تشرق ولو واصلت لآخر المقطع بتلاقي ان الشمس طلعت وصار قبل الظهر تقريبا ً. منظر حلو ومريح 😭❤
.
.
.
المقطع الي بعده من فيلم هاري بوتر برضو <– big fan 😬
لغرفة غريفندور، قدام المدفئة والجو برا ممطر وفترة مساء. صوت المطر معروف انه يهدئ ويساعد الي عندهم أرق بعد.
.
.

الحين جاء وقت القناه العظيمه الي سحرتني بمجال الأصوات المحيطية !

يحطون ثيمات وأجواء غريبه ومميزه، مثلا ً متجر جرعات (potion) زي الي في العصور القديمه.
أو سفينة قراصنه وقت عاصفه ، أو نزل قديم أو مكتبه بطراز قديم وفخم.
.
اسم القناه The Guild of Ambience – ( رابط القناة )
.
.
أقدّر جهودهم كثير، عمل راقي وفكره عبقريه وشغلهم متقن 
شفت قنوات كثير تسوي هالشيء بس هالقناه شغلهم متقن ومزبوط 
جربوا المره الجايه تشغلونها وقت الرسم أو الكتابه أو القراءة أو الأعمال اليدويه
أو حتى لو متبطحين تتفرجون عالسقف وتفكرون في شيء تسوونه.
فيه جزء ثاني لهذا الموضوع من (هنا).
.
.

Write a Comment
معنى Hygge
Books - كتب

Hygge معنى

رمضان مبارك، تقبل الله منا ومنكم صالح الأعمال
.

Hygge كلمة دانماركية استخدمت من بدايات عام 1800 لكن أصلها كلمة نرويجية قديمة وهي تشير إلى نمط حياة

مؤخرا ً انتشرت في أمريكا ودول اخرى كثيرة. الكلمة مالها ترجمه حرفية لأنها مشاعر أو توجه ونمط حياة.
حبيت أنقل لكم هالمصطلح بشكل بسيط.
.
تنطق ( هو-جاه ) فيه ياء قبل الواو بالكاد تلاحظها
وحرف G ينطق مثل الي في كلمة Good وليس كما في كلمة Legend.
بعضهم يترجمونها ( العيش بشكل دافئ ومريح ) أو ( العيش بالشكل الذي تحبه مع الأشخاص الذين تحبهم ).
.
اذا اخترت تدخل مود أو نمط حياة Hygge غالبا ً فيه أمور تحتاج تسويها
غير انك تكون مع الأشخاص الي تحبهم وتشارك معهم وقتك ونشاطاتك
فيه كتاب صغير يشرح معنى الكلمه وكيف يقدر الشخص يعيش بهذا النمط
من ضمن الصفحات كان فيه بعض المتطلبات الي تشكل لك نمط حياة متكامل
جمعتها في صوره وحده واختصرت بعض الشرح ..
.
Hygge معنى
.
لفت انتباهي تعريف من تعريفات هالكلمه وهو

( الاستمتاع بكل شيء وكل لحظه، مع الأشخاص الي تحبهم )

هذا التعريف الي أعجبني لأن في السنه الأخيره صرت أحب أستمتع بحاجات بسيطه
نظرا ً لأن المنطقه الي أنا فيها خامله ومافيها أي نوع من أنواع الترفيه الي كنت أحبه
فصرت أستمتع حتى لو خروج للحوش دقيقتين مع أمي توريني شجره أثمرت
أو تقول لي فكره ما عمرنا راح ننفذها بس نستمتع واحنا نناقشها
.
أغلب الي يحبون هالمصطلح يكونون “ديدان كتب” ي
حبون يسوون لهم جو زي كذا لأنهم أغلب وقتهم شبه جاهزين ومستوفين المواصفات المطلوبة لهالنمط.
قراءة الكتب تعتبر من الأمور المناسبه للـHygge.
.
نمط Hygge حلو ومبدأ راقي يمشي عليه الواحد بحياته.
بس ما أعتقد أحد يقدر يخليه نمط حياه مستمر..
عن نفسي شخصيتي متقلبه وديناميكيه ما أحب أتبع نظام هادي ومسالم لفترات طويله
علشان ما أعاني من فرط حركه وأروح أتسلق جبل
بس حلو لما الواحد يكون مكتئب أو طفشان يقدر يخلق لنفسه أجواء ويقدس اللحظه 
من أبسط الأمور المطلوبه والمتبعه: الامتنان الشموع والإضاءاتتناول بعض الأطعمه الخاصه
أعتبره نوع من الحمد ان الشخص يحس بالسعاده والامتنان لمجرد كونه على قيد الحياه بعافيه وكثير من النعم الي ما نقدر نحصيها.
.
.
Write a Comment
حديقة الجنيّات
DIY Nature

حديقة الجنيّات ~ Fairy garden

أخيرا ً حديقة الجنيّات!! ❤😭😭😭😭
.
.
من 4 سنوات أو أكثر أبغى أسوي حديقة الجنيّات وأحطها عالشباك
حديقة الجنيّات Fairy Garden شيء يسوونه الناس من الأزل في الحدايق وأحيانا ً يكون داخل البيت 
.
بعض الناس يؤمنون بالجنيات وبعضهم يكتفون بمجرد أنه من اللطيف انهم يصنعون حديقه أو حتى قريه للجنيّات
أغلب المهتمين في هالفكره هم الناس الي أصلا ً يحبون الحاجات الصغيرة ( المصغّراتMiniature
.

أهل الـMiniature هم الناس يصنعون حاجات صغيره

مثلاً بيوت فيها أثاث صغير وبالأدوات الي فيه كامله وحتى المفارش تكون من القماش
الأرضيات تكون خشب واللمبات تشتغل فعلا ً والستاير ممكن في بعض الحالات تنفتح وتتسكر والشبابيك نفس الشيء
.
بالنسبه لي أنا مهتمه بالمصغرات وسبق سويت نماذج صغيره غير ناجحه 
بعضها لحديقه أو حوش أو غرفه داخل علب معدنيه أصغر من راحة اليد
مثل هذا وأصغر منه كمان ( يجيب فرط حركه شنيع علشان كذا وقفته )
.
حديقة الجنيّات
.
حديقة الجنيّات حجمها يعتمد على الحوض أو المساحه الي عندك
أنا أبغى أحطها عالشباك برا غرفتي لأن فيه مساحه كافيه.
حافة الشباك فيها مساحه بارزه مثل الرف
منظر الحديقه هناك بيكون حلو أولا ًَ، وبيعجب العصافيرثانيا ً 😍
.
وبهالمساحه حاطه لهم حوضين مويه برا حديقة الجنيات، واحد لهم وواحد للنحل 
**النحل يجون عند الشباك برضو لأني حطيت ورد ابيض ريحته تشبه العسل
ويحبون يتحممون ويشربون إذا حصلوا حوض صغير ما يغرقون فيه
ينفع تحطون صدفه مقلوبه وفيها مويه بس ارفعوها عن الأرض بسدادة فلين أو شيء يرفعها شوي.
.
بعض الأشخاص يحبون يحطون مجسمات مصغره لكائنات حيه، أرانب ومن هالكلام.
بس أنا أشوف انها تخالف الفكره
الجنيات ما عندهم أصلا ً سناجب وأرانب بحجمهم، فيه فرق بين المصغرات وحديقة الجنيات
.
حديقتي تنقصها جنيّه صغيره تكون جالسه عالحافه
بس للأسف أغلب الي حصلتها في أمازون حجمها كبير بالنسبه للحوض ومقاس البيت والمدخل
لسى أبحث. وبرضو كنت أبغى أثاث خارجي زي كراسي ومظله مصنوعه من اوراق الشجر بس ما توفرت الأغراض عندنا في المكتبات.
.
حديقة الجنيّات
.
.

الي بيقول ( العصافير ما دروا عنك )

أنا أقول انهم دروا عني. يعرفون ان فيه أحد بالغرفه يحط لهم مويه وأكل وألعاب وورد
ومره من المرات لقيت واحد من العصافير يصيح عند الشباك ويخبط علشان ما حطيت مويه
أنا مهتمه بالبيئه الخارجيه لشباك غرفتي، لأني جربت أكسب ثقة العصافير في فتره من الفترات
صاروا فعلا ً يلعبون عند الشباك أغلب الوقت، ويحتمون فيها وقت المطر، ويتسبحون في المويه الي حطيتها لهم
وإذا شغلت أليكسا على اذاعه وبصوت عالي يجون يتلقفون يسمعون ويشوفون وش السالفه
.
أنواع العصافير في المنطقه منوعه وجميله ومن ضمنها الطنّان ( طائر صغيير ومنقاره مثل الابره يحب يشرب من الورد زي النحل ) 
هذا الطائر مبسوط عند الشباك لأني صنعت له مرجيحه صغيره وزينتها بأوراق شجر وورد أحمر لأن الطنان يحب اللون الأحمر
شفته يتمرجح عليها 4 مرات وذاب قلبي 😭😭💔 شيء صغيييير يتمرجح.
.

نجي لصور حديقة الجنيّات الي سويتها وكم ملاحظه عليها 

.
حديقة الجنيّات
حديقة الجنيّات
.
⭐ الكريستالات عالمدخل وعالعمود الي بأقصى اليمين علشان تعكس نور الشمس وينتبهون لها ويجون
وبعد تسوي قوس قزح <-- بذيتينا بقوسك
⭐ قبل فتره كان فيه إطلاق تجريبي لحديقة الجنيات 😂😂😂 سويت واحد مبسط مره وأي كلام
بس علشان أشوف بيعجبهم ولا لا، لأن مافيه شيء يفيدهم أو يقدرون يسوونه فيه.
تفاجأت أن الفضول ذابحهم ، يوقفون عنده ويميلون راسهم ويحاولون يقربون منه بحذر
بعد دقايق صاروا وسطه يستكشفون.
⭐ اللمبات الي حطيتها ماراح يستفيدون منها في النهار وماراح أشغلها في الليل وأبتلش بالحشرات
بس كذا عجبتني قلت أسويها مالي صلاح..
⭐ هذا الشكل لحديقة الجنيات يعتبر بسيط جدا ً، في النت لو تبحثون تشوفون أشكال عظيمه وناس موهوبين فعلا ً.
⭐ المكونات كلها حجر وتراب والباقي لمخيلتك تبدع فيها. أمي ساعدتني كثير وأعطتني أدوات وخامات.
اختي تقول لون المدخل حق البيت مفروض من فوق يكون أحمر وفيه نقشات بيضاء علشان يصير فطر عادي
بس ما أبغى أستخدم ألوان الاكريليك الحين علشان ريحتها قويه وبعد شوي بنام.
.
.
.
Write a Comment
crystal rainbow
DIY Nature

Fill your room with rainbows

 .
دققتوا من قبل في الشعور الي تحسون فيه إذا شفتوا قوس قزح؟
تحسون أنه شيء من عالم ثاني.. مع أنه شيء ماله فايده ولا أعتقد أنه يساعد في التوازن البيئي ولا يسوي شيء
بس مع ذلك أشوفه نعمه كبيره من ربي.. 
  .
  .
قبل رمضان عام 2017 لقيت كريستالات من ثريّا المدخل كانت مكسوره ومنثوره على الأرض
وأمي تدعي عالعمال الي كانوا يشيلون أثاث وكسروها، تقول (الله يكسر ضلوعهم) <- دعوات مقتبسه من قاموس دعوات جدتي، وهو قاموس لا يمزح بأي شكل من الأشكال *قشعريره* لا تنخدعون بلطف الدعوه السابقه، هذي ولا شيء 
  .
أخذت الكريستالات الي لسى سليمه وعلقتها على شباك غرفتي علشان لما تشرق الشمس من جهة غرفتي أشوف قوس قزح في الغرفه كلها 😎
 .
للأسف كان عباره عن نقط صغيره ومع أنه حلو وعجبني لكن كنت أبغى كريستالات أكبر ..
طلبت أمي أشيل كريستالات كبيره من الثريا المكسوره، أعطتني تحذير ما يمزح، فقررت أبحث بمكان ثاني
 .
في الأخير بعد سنه كامله من البحث حصلت على 4 كريستالات كبيره وعلقتها في سلسله بخرزات وحطيت وحده منها على الشباك علشان أجربها .. هذا شكل الكريستالات:
.
.
rainbow crystal
.
crystal rainbow
,
الصباح التالي كان مبهج بشكل لا يوصف، أعجز عن وصفه، وسعادتي توصل للقمه كل ما أتذكره..
صحيت من النوم لقيت في كل جدران الغرفه وعلى السقف وفي كل مكان ألوان قوس قزح
يا الله كيف شيء بسيييط زي كذا ينعش الروح ويعطي دفى وراحه !!
.
crystal rainbow
.crystal rainbow
.
.
بعدين تذكرت اني مره قرأت أن الكريستالات يستخدمونها الي يؤمنون بمبدأ طاقة المكان
لأنها ترفعها بشكل كبير.
.
قوس القزح من أنقى وأجمل الأمور في الحياه، لاحظوا أنه ظاهره تدخل السعاده في قلب أي شخص.
أكره كيف انه صار شعار للمثليين، وش العلاقه بين المثليين وقوس القزح؟
احتكار شيء من الطبيعه علشان يمثل فئه معينه شيء يدل على تخلف.
 .

 

Write a Comment