anxiety - القلق Books - كتب DIY Nature

الأصوات المحيطية كبيئة مناسبة للقراءة والاسترخاء

.
 الحاجات الي أبغى أكتب عنها ومقاطع الفيديو الي راح أعرضها ممكن تشوفون في عناوينها يكتبون كلمة ASMR
بس مو هذا الشيء الي أبغى أوصله من تدوينتي أبدا ً!
أنا أتكلم عن نوع آخر من المقاطع لكن بالفتره الأخيره صار هالمصطلح يرتز في أي شيء يكون الغرض منه الاسترخاء، مع العلم أنه غلط وماله علاقه. بكتب السبب باختصار
.
ASMR تطلق على المقاطع الي تعطي المشاهد نوع من الارتياح أو الرضى، مثلا ً بنت تمشط شعر بنت ثانيه، يحطون الأصوات بحيث يسمعها المشاهد كأن الفرشاه تمشط شعره هو.. مثلا ً واحد يعمل مساج لفروة رأس شخص آخر، أو مساج للجسم ومن هالكلام ..
وفيه ناس مدري وش جوهم يحسون بالراحه على مقاطع فيها أصوات أحد يمضغ أكل !! أو يحرك شفايفه ويطلع أصوات ببراطمه
.
بس إجمالا ً فيه انحرافات في هالمصطلح لأنه يرمز أصلا ً لحاجات ممكن تندرج تحت تصنيفات سيئه.
تقدرون تطلعون على معاني وشرح المصطلح بأنفسكم في الانترنت. ما بجيب هالخياس لمدونتي احتراما ً للقراء.
الأصوات المحيطية مو بالضروره تندرج تحت هالمصطلح بس فيه ناس يدمجونها سوا.
.
الأصوات المحيطية Ambience
 
.

أرجع لسالفتي الأساسية الآن بعد ما أبريت ذمتي 😗 

.
وقت القراءة أو الانشغال بشيء في مكان واحد تحتاج تشغل لك شيء تسمعه. بس أحيانا ً تكون محتاج تركيز فما تبغى تسمع شيء فيه كلام أو زحمه.
فيه مصطلح اسمه ( الأصوات المحيطية ) طالعين فيه ناس كثير في قنوات اليوتيوب 😍
يحطون لك فكره معينه يدخلونك جوّها.
.
مثلا ً يحطون لك زاوية تصوير من مقهى ، تشوف الناس ماشيه وتسمع صوت ناس تتكلم بهدوء على شوية أصوات أواني، وأصوات أقدام الناس الرايحه والجايه بعض الأحيان يدخلون موسيقى جاز على خفيف أو بيانو.
بشكل يخليك تحس انك موجود هناك. وما تكون صاخبه ومزعجه.
فيه أفكار وأماكن كثير مصورينها ومسجلينها
.
مره من المرات كنت أبحث وطلعت لي قناه يوتيوب مسوين مقاطع الأصوات المحيطية بثيمات تشبه ألعاب الفيديو والأفلام، مثلا ً هاري بوتر وهوبيت وملك الخواتم وغيرها. يجيب لك صوره مكان من أماكن هالأفلام وأصوات، تدخل جو وتسترخي وانت تشوف البيئه تتغير، مرات يكون فيه مطر وبعد شوي الشمس تشرق. مقاطعهم تكون طويله مثلا ً 3 ساعات، بس الغرض منها مو انك تتابعها طول هالوقت!
بس شغلها واسترخي أو اشتغل أو اقرأ. فيه ناس يستخدمونها يتخلصون من الأرق والقلق والاكتئاب.
.
بحط رابط قناة أعجبتني وصرت أعتمد مقاطعها كثير إذا كنت أبغى أقرأ في جو هادي بدون ما أحس بالنعاس. 
بس قبلها بحط مقطعين أعجبتني من قنوات أخرى 
.
هنا حاطين كوخ من فيلم هاري بوتر. يبدأ المقطع من الفجر بدري على نفس الزاويه في المطبخ.
والشمس تشرق ولو واصلت لآخر المقطع بتلاقي ان الشمس طلعت وصار قبل الظهر تقريبا ً. منظر حلو ومريح 😭❤
.
.
.
المقطع الي بعده من فيلم هاري بوتر برضو <– big fan 😬
لغرفة غريفندور، قدام المدفئة والجو برا ممطر وفترة مساء. صوت المطر معروف انه يهدئ ويساعد الي عندهم أرق بعد.
.
.

الحين جاء وقت القناه العظيمه الي سحرتني بمجال الأصوات المحيطية !

يحطون ثيمات وأجواء غريبه ومميزه، مثلا ً متجر جرعات (potion) زي الي في العصور القديمه.
أو سفينة قراصنه وقت عاصفه ، أو نزل قديم أو مكتبه بطراز قديم وفخم.
.
اسم القناه The Guild of Ambience – ( رابط القناة )
.
.
أقدّر جهودهم كثير، عمل راقي وفكره عبقريه وشغلهم متقن 
شفت قنوات كثير تسوي هالشيء بس هالقناه شغلهم متقن ومزبوط 
جربوا المره الجايه تشغلونها وقت الرسم أو الكتابه أو القراءة أو الأعمال اليدويه
أو حتى لو متبطحين تتفرجون عالسقف وتفكرون في شيء تسوونه.
فيه جزء ثاني لهذا الموضوع من (هنا).
.
.

Write a Comment
Books - كتب

Harry Potter and the Philosophers Stone ~

روايات هاري بوتر مب محببه عند كثير من الناس الي أعرفهم
ممكن بسبب سلسلة الأفلام الي طلعت لهالرواية

b4642-0
.
مع أن حتى الأفلام برأيي كانت عظيمه ومشوقه
لكن الكتب! ما أعتقد أحد يقدر ينكر لأي حد هي ممتعه وقصتها محبوكه..
. 
جبت لكم القصة الأولى ( هاري بوتر وحجر الفلاسفة ) كاملة
مسموعة باللغة الانجليزية، القارئ موهوب بكل ماتعنيه الكلمة، يقلد الأصوات
ويقرأ بشكل يخليك تشعر أنك متابع للأحداث وتشوفها أمامك وتتخيل أشكالهم طبقا ً لنبرة الأصوات الي يختارها.
. 
كانت الملفات مرفوعه على جوجل درايف بس انحذفت.. خفت أرفعها على حسابي ويحذفونه..
فجبتها من اليوتيوب.. بالإمكان تحميلها على صيغة ملفات صوتية ونقلها لمشغل الموسيقى الي تستخدمونه.
.
هذا رابط القائمة الي فيها الفصول على اليوتيوب
.
أول فصل (مقطع)  ممكن يكون ممل شوي خاصة الحوار بين البروفيسوره ودمبلدور..
بعدها القصه كلها ظريفه بشكل لا يوصف..
.
برضو جربوا تعطون الفلم فرصه، الجزء الأول بس.. فيلم ينفع علشان تغير جو وتعيش جو خيالي..
.
1b6be-2

.

عندي أخو ما يطيق هاري بوتر ولا ملك الخواتم ولا هوبيت. ودايم يسب يقول أن متابعين هالأفلام ساذجين.
بس بصراحه أفلامه المفضله تجيب لي الهم، فأنا أعرف أنها مسألة أذواق، يعني الي ما يحب الفانتزي مب مشكله D:

.

Write a Comment